«Башҡорт балаҫы» төбәк-ара фестивале төрлө яҡ оҫталарын бер урында тупланы. Маҡсат ошо аллы-гөллө ҡул эштәрен күрһәтеү генә түгел, ә оҫталыҡ дәрестәре аша үҙебеҙҙең арала һөнәрселәрҙе лә арттырыу ине. Балаҫ һуғыу өсөн ҡоролмала эш башлап ебәреү әллә ни ауыр ҙа түгел икән – теләгән кеше быға өйрәнә алды.
Ҡумыҙҙа уйнау, милли яндан уҡ атыу, хатта һарыҡ йөнөн алыу буйынса ла оҫталыҡ дәрестәре үткәрелде. Бер яҡта буҙа, ҡымыҙ һаталар, түшелдерек, алҡа кеүек биҙәүестәр тәҡдим итәләр. Икенсе ерҙә балалар милли уйындар уйнап кинәнә. Өсөнсөһөндә дәртле концерт ҡарайҙар... Матур тамаша!
Тарихҡа күҙ һалғанда, балаҫ башҡорттарҙа өй биҙәге ролен генә үтәмәгән. Һарыҡ йә кәзә йөнөн үҫемлек буяуҙары менән буяп һуғылған был затлы әйбер тирмәне лә йылытҡан, ҡыҙ оҙатҡанда һандыҡ эсенә лә һалынған, яңы тыуған балаға ла бүләк итеп бирелгән.
Оҫталар байрамдан тәжрибә туплап, белгәндәре менән уртаҡлашып ҡайтты. Тәүге тапҡыр үткәрелгән фестиваль һуңғыһы булмаһын.
Лилиә МӘҮЛИТОВА.