Беҙҙә йыйын, әйҙә, йыйын!
Һүҙ уйнатып, күңел асырға,
Йырҙар йырлап, бейей-бейей,
Тыпырлатып килтереп баҫырға!
«Бәпембә» бөркөттәре» тип аталған йыйын уҙғарҙыҡ. Элек шундай сараларҙа яңы батырҙар һайланған, сәсәндәр үҙ-ара көс һынашҡан. Тирә-яҡ гөрләп торған. Беҙ ҙә йоланан ары китмәй, ошо өлгөләрҙе ҡулланып, батырҙарыбыҙҙы майҙанға сығарҙыҡ.
Уртансы, өлкән һәм мәктәпкәсә әҙерлек төркөмдәре тәрбиәләнеүселәре ижади конкурста үҙҙәрен күрһәтте – йырҙар йырланылар, бейеү башҡарҙылар. Тыуған ил, башҡорт халыҡ ижады буйынса һорауҙарға төплө яуап ҡайтарҙылар. Уҡ атыу, ат сабышы кеүек ярыштарҙа ла һынатманы улар.
Афарин, «Бәпембә» бөркөттәре»!
Әнисә РАХМАНҒОЛОВА,
«Бәпембә» балалар баҡсаһының
өлкән тәрбиәсеһе.
Хәйбулла районы, Аҡъяр ауылы.