+12 °С
Ямғыр
Бөтә яңылыҡтар
Юбилейҙар
28 Сентябрь 2018, 16:00
Шағир, журналист, йәмәғәт эшмәкәре Нияз СӘЛИМОВҡа – 60 йәш
Ғалим, яҙыусы һәм журналист, дәүләт эшмәкәре Нияз Сәлимов 1958 йылдың 27 сентябрендә Ғафури районы Яугилде ауылында тыуған. Стәрлетамаҡ дәүләт педагогия институтының филология факультетын тамамлаған. «Йәшлек», «Башҡортостан» гәзиттәрендә, Ғафури районының «Йондоҙ», «Табын» баҫмаларында баш мөхәррир булып эшләй.Әлеге көндә ул – Башҡортостан Республикаһы Милли архивының директор урынбаҫары.Балалар өсөн яҙған китаптары: «Ҡурсаҡ булғы килмәне» (1992), «Атайым йомаҡтары» (1995), «Әнүзә һәм шуҡ кәзә» (1997), «Ҡояш – ул ҡош» (2006).
Ҡояш һүҙе
Яратам мин Ер-ҡитғаны,
Йылытам шуға уны.
Ә ҡыштарын ныҡ һыуыҡта,
Ап-аҡ ҡар була туны.
Яратам мин Ер шарының
Һәммә тырыш кешеһен.
Туҡ башаҡтар – емеше ул
Уларҙың ҙур эшенең.
Бары шундай уңғандарҙы
Күмәм нурға – хөрмәткә.
Бар ҡоштарға ҡушылып, мин
Дан йырлайым хеҙмәткә.
Байлыҡ
Тыуған ерем, туған телем
Әсәйемдәй ҡәҙерле.
Иң ҡиммәтле был байлыҡты
Һин һаҡларға әҙерме?
Бал
Олатай нәсихәте
Балсыҡ түгел ул – бал, балам,
Телдең осонда – тәме.
Бал ҡәҙерен белһәң әгәр,
Артыр донъяңдың йәме.
Мин – олатай
Ҡулға тотоп сыбыртҡымды,
Сабып киттем менеп тай.
Ат өйрәтеү анһат түгел –
Булдым бөгөн олатай!
Аҡман-тоҡман
Буран бабай атын еккәс,
Тирә-йүнде байҡаны.
Иңләне ул яландарҙы,
Урмандарҙы айҡаны.
Кискә табан барып етте
Ауылдарға, ҡалаға.
Ҡар тауҙары өйөп китте
Бөтөн ергә тағы ла.
Төнө буйы Аҡман-тоҡман
Атын ҡыуҙы һыҙғырып.
Таң алдынан хәлдән тайҙы
Тирә-яҡты ҡыҙырып.
...Әле йоҡлай Буран бабай –
Шым тороғоҙ, балалар!
Ул уянһа, тәбиғәттә
Ҡыҙып китер болалар.
НЛО-лар
Күк хужаһы ҡара төндә
Сығарҙы ҡарар.
Осто Ергә, НЛО-лай,
Күбәләк ҡарҙар.
Яҙғы йыр
Ҡар һыуҙары йыйылып,
Күләүектәр йырыла.
Сыйырсыҡтар ҡушыла
Йырғанаҡтар йырына.
Концерт бара. Гүйә, яҙ
Йырлап ерҙе сәләмләй.
Бейей ҡояш нурҙары,
Елдәр итә сәпәкәй.
Илата
Аяҡ аҫты йәнә епшек,
Ҡыйыҡтан тама тамсы.
Эй, илата яҙ апрелде –
Ҡулында, гүйә, ҡамсы.
Ташҡын
Боҙ тунҡайын сисеп ташлап,
Ярға ашҡынды йылға.
Баҫып алды үҙәндәрҙе,
Шунан ынтылды юлға.
Йөрөр әмәл һис ҡалманы,
Гүйә, диңгеҙ – йән-яҡта.
Көслө ағым ыңғайына
Аға бүрәнә, таҡта.
Ҡолас ташлап килә ташҡын:
«Баҫып китәм!» – тип янап.
Ул маһая, барлыҡ ҡарҙы
Ҡояш алғанға ялап.
Ташҡын ғүмере оҙон түгел,
Ярына ҡайтыр һыуҙар.
Туғайлыҡта барса ҡоштар
Шатлыҡ йырҙарын һуҙыр.
Шишмә лә йырлай
Ҡосаҡ-ҡосаҡ сәскә менән
Яҙбикә, ана, килә.
Ағастар ҙа таңдан тороп
Йәшел күлдәген кейә.
Йырлап туймай шишмә, йылға,
Яҙ килеүгә һөйөнөп.
Ҡоштар ҙа бит, эй, ҡыуана,
Көй һуҙалар өйкөлөп.
Сихри моңға тирбәлешә
Туғайҙағы барса тал.
Яҙҙың был симфонияһын
Тыңлай ҙур зал – атайсал.
Көтәбеҙ һағынып
Сыйырсыҡтар йылы яҡтан
Ҡайтмаһа ла, тим, мартта.
Көн элгәре яһап ҡуйҙым
Ҡошҡайҙарға умарта.
Беҙ, балалар, һеҙҙе йыл да
Көтәбеҙ бик һағынып.
Тиҙ(е)рәк ҡайтып етегеҙсе,
Ҡанатығыҙ ҡағынып.
Һеҙ, ҡошсоҡтар – беҙҙең дуҫтар,
Яратабыҙ беҙ һеҙҙе.
Саф йөрәктән хөрмәт менән
Әйтәбеҙ беҙ был һүҙҙе.
Сыйырсыҡтар йыр һуҙмаһа,
Йәме юҡ һис бер яҙҙың.
Улар көйөнә сорналып,
Ошо шиғырҙы яҙҙым.
Мин – сыйырсыҡ, һеҙгә, дуҫтар,
Әйтәйем, тимен, рәхмәт.
Һеҙ булғанға – беҙ бәхетле,
Йырлап йәшәү – эй, рәхәт!
Сыйырсыҡтар ҡайта тиҙҙән,
Тигәс атай бер көндө,
Өй эшләргә ҡарар иттем,
Сисеп ташлап бүркемде.
Йырсы ҡоштар оркестрын
Етте бына йыйыр саҡ.
Мәңге йәшә донъя биҙәп,
Яҙҙың күрке – сыйырсыҡ!
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж