Әйткәндәй, «Ленинсы» 1990 йылда «Ленинец» гәзитенең башҡортсаға тәржемәһе булып сығыуҙан туҡтай. «Йәшлек» тип аталып, үҙ аллы донъя күрә башлай. Бынан һуң ул халыҡҡа бигерәк тә яҡыная, тиражы ла арта. Редакция башҡорт йәштәрен берләштереп, төрлө саралар үткәрә. «Урал моңо», «Һылыуҡай», «Йәшлек-шоу» конкурстарын тәү башлап «Йәшлек» ойошторҙо бит. Шәйехзада Бабич исемендәге йәштәр премияһына конкурс та тәүҙә ошо гәзит тарафынан иғлан ителде һәм бер нисә йыл редакция уны тапшырып килде.
Әле лә төрлө ижади бәйгеләр ойоштороп торалар. Йыш ҡына гәзит уҡыусыларҙың, «Йәшлек»те нәҡ ошо рубрикаһы өсөн алдырам, тиеүен ишетергә мөмкин. Тимәк, баҫма биттәрендә һәр кем үҙенә тәғәйен материал таба ала. «Йәшлек» башҡорт баҫмаларынан иң күп тиражлы булып, халыҡ гәзитенә әйләнде.
Йәштәр гәзиттәрен юбилейҙары менән Башҡортостан Республикаһы Башлығы Радий Хәбиров та ҡотланы. «Һеҙ рухи һәм ғаилә ҡиммәттәрен, милли йолаларҙы, Башҡортостан халыҡтары телдәрен һаҡлауға, илһөйәрлек тәрбиәләүгә, сәләмәт тормошто таратыуға ҙур өлөш индерәһегеҙ. Ялған мәғлүмәттәр ағымына һөҙөмтәле ҡаршы тораһығыҙ, уҡыусыларығыҙға дөрөҫ мәғлүмәт бирәһегеҙ, йәш быуынды илебеҙҙең тарихына һәм мәҙәниәтенә ылыҡтыраһығыҙ», – тип белдергән ул.
Гәзит уҡыусылары менән көслө. «Йәшлек» менән «Өмет» һаман да үҙ йөҙө булған иң уҡымлы баҫмалар иҫәбендә. Уларҙы яраталар, хөрмәт итәләр. Ҡыҙғанысҡа ҡаршы, «Молодёжная газета» хәҙер электрон вариантта ғына сыға.
Ҡәләмдәштәребеҙҙе байрамдары менән ихлас ҡотлайбыҙ. Ижади үрҙәр теләйбеҙ. Артабан да уҡыусыларығыҙҙың иң яратҡан баҫмаһы булып ҡалығыҙ!