Өс йәшлек ҡыҙы ҡалды...

24 йәшлек батыр, сая егет махсус хәрби операция барышында сентябрь башында хәрби мәғлүмәттәр белгән кешене әсирлеккә алып танылыу яулағайны. Хатта яуҙаштары янына дошмандың БТР-ына ултырып ҡайтты. Унан һуң да ҡыйыу яугир иптәштәрен ҡотҡарыуҙа батырлыҡ күрһәтә. 

Яраланып тыуған ауылына, Тәтешле районы Яңы Ҡайпан ауылына ҡайтып киткәйне. Насар хәбәрҙәр ишетелгәс, халыҡ уның тере булыуына өмөт итте, ләкин өмөттәр аҡланманы.

Бөгөн Тәтешлегә матәм сараһына Башҡортостан Башлығы Радий Хәбиров та барҙы. Фәнистең әсәһенең, яҡындарының ауыр ҡайғыһын уртаҡлашып, үлгәндән һуң Шайморатов орденын тапшырҙы.

Фәнис Әҙип улы Хөсәйенов Яңы Ҡайпан ауылында 1998 йылдың 14 майында тыуған. Уҡытыусылары әйтеүенсә, шат күңелле, иптәштәренә һәр саҡ ярҙам ҡулын һуҙырға әҙер торған уҡыусы булған. Спорт яратҡан, көрәш менән шөғөлләнгән. Батырҙың өс йәшлек ҡыҙы етем ҡалды... Фәнис 2022 йылдың 20 декабрендә махсус хәрби операция барышында бурысын үтәгәндә һәләк булған.

Районда кесе сержант Хөсәйеновтың исемен мәңгеләштереү сараһын күрәсәктәр. 

Яҡындарының, туғандарының ауыр ҡайғыһын уртаҡлашабыҙ.

Фотолар асыҡ сығанаҡтан.