Башҡортостан Башлығы Хакимиәте етәксеһе Максим Забелин балаларҙы сәләмләп, уларҙы ҡунаҡсыл башҡорт ерендә күреүенә шат булыуын белдерҙе.
Оҙайлы юлда арыуҙарына ҡарамаҫтан, Красный Луч ҡалаһынан килгән ҡыҙҙар һәм малайҙарҙың кәйефтәре күтәренке ине.
-Башҡортостанға килеүебеҙ менән бәхетлебеҙ. Тәбиғәт ҡомартҡыларын, төрлө иҫтәлекле урындарҙы күрергә, Өфө менән танышырға күптән хыялландыҡ. Шуға поездан килеп төшөү менән арыуҙарыбыҙ ҙа онотолдо, алда бит беҙҙе күңелле матур ял көтә, - тип тәьҫораттары менән уртаҡлашты Богдан һәм София.
Республика Хөкүмәте Премьер-министрының беренсе урынбаҫары Азат Бадранов белдереүенсә, Луганск балалары өсөн бай йөкмәткеле ял итеү программаһы әҙерләнгән. Улар республикабыҙҙың матур тәбиғәте менән генә түгел, ә халҡыбыҙҙың мәҙәниәте менән дә танышасаҡ.
Әйткәндәй, йәйге каникулда Луганск Халыҡ Республикаһынан 8 төркөм балаларҙы ҡабул итеү ҡаралған, унда барлығы меңдән ашыу ҡыҙ һәм малай ял итәсәк. Ә йыл аҙағына тиклем ЛНР-ҙан оло йәштәге 300-ләгән кеше республика шифаханаларында шифахана-курорт дауаланыуын аласаҡ.
Фото: userapi.com