+12 °С
Болотло
TelegramVKOKTikTok
Бөтә яңылыҡтар

Балаларҙың мәҙәни форумы

«Арт-Ҡоролтай.Балалар» мәҙәни форумы быйыл икенсе тапҡыр ойошторолдо. «Торатау» конгресс-холына республиканың мәҙәни белем биреү учреждениелары хеҙмәткәрҙәре, уҡыусылар йыйылғайны. Был сараның маҡсаты – балаларҙың һәләттәрен үҫтереүгә мөмкинлектәр асыу.

Сәнғәт мәктәптәренең етәкселәре, педагогтар өсөн грантҡа нисек проекттар әҙерләү тураһында тренинг та үткәрелде.

Фойела республиканың мәҙәниәт һәм сәнғәт уҡыу йорттары күргәҙмәһе менән танышырға мөмкин ине. «Тамырым – башҡорт» тигән форум сараның бер өлөшө булып торҙо. Бында Ырымбур, Силәбе, Свердлов, Ҡурған өлкәләренән, Пермь крайынан, Ханты-Манси автономиялы округынан балалар делегациялары килгәйне. Уларҙы бик мауыҡтырғыс оҫталыҡ дәрестәре лә көтә ине. 
«Мәргән уҡсы» хәрәкәте етәксеһе Юлай Ғәлиуллин үҙҙәренең эшмәкәрлеге, уҡ-һаҙаҡ менән таныштырһа, ҡурайсы, бейеүсе Рәйес Низаметдинов иһә ҡумыҙ, ҡурай тураһында һөйләне. Ул балаларҙың күҙ алдында ҡурай эшләп күрһәтеп, уйнап та ебәрҙе. Йәнле аралашыу рәүешендә барған осрашыуҙа ҡыҙҙар, малайҙар әүҙем ҡатнашты. Ҡумыҙҙа, ҡурайҙа уйнап күрһәтеүселәр ҙә булды. 
Ә фойела Салауат музыка колледжы теләүселәргә барабанда, бас-гитарала һәм башҡа музыка ҡоралдарында уйнап ҡарау мөмкинлеге бирҙе. «Арт-Ҡоролтай.Балалар» форумына танылған йырсы һәм музыкант, «Рәсәй балалары берлеге» ойошмаһы етәксеһе Сергей Крылов та килгәйне. Ул буласаҡ йондоҙҙар өсөн оҫталыҡ дәресе үткәрҙе, кәңәштәрен бирҙе.
Шулай уҡ был көндө ЮНЕСКО-ның ассоциациалан­ған мәктәптәренең Балалар палатаһы ултырышы ла уҙҙы. Уны тулыһынса уҡыусылар, буласаҡ лидерҙар, үҙҙәре алып барҙы. Квестар үткәреп, ҡануниәткә, экологияға, республикала йәшәгән халыҡтар тарихына, йолаларына ҡағылышлы төрлө мәсьәләләр систеләр, һорау­ҙарға яуап бирҙеләр. 
«Арт» инглиз телендә сәнғәт тигәнде аңлата. Арт-Ҡоролтай­ҙа кино, театр, бейеү сәнғәтенә лә иғтибар бүленде. Балалар­ҙың ижади һәләттәрен асыу, үҫтереү, нисек итеп төрлө кимәлдәге конкурс, фестивалдәр­ҙә ҡатнашыу тураһында ла һүҙ барҙы. 

Э. РӘШИТОВА.

Автор:Юлиә Кирәева
Читайте нас в