Юлаевсылар Радий Хәбиров менән осрашты

– Хәҙер йолаға әйләнде инде. Беҙ һеҙҙең менән йыл да осрашып торабыҙ. Ни тиһәң дә, «Салауат Юлаев» – яратҡан командабыҙ, ғорурлығыбыҙ. Беҙҙе быйыл икеләтә юбилей көтә. Клуб төҙөлөүгә – 60, ә юлаевсылар Гагарин кубогын яулауға 10 йыл була. Оло байрамдарҙы яҡшы кәйеф менән ҡаршылағы килә. Әйҙәгеҙ, кубок икенсе тапҡыр беҙҙеке булһын! Ҡулығыҙҙан килә, көсөгөҙ бар, эйе бит?! – тип командабыҙға фатихаһын да бирҙе республика етәксеһе.

Радий Фәрит улы Башҡортостанда хоккей үҫешенә ҙур иғтибар бүленеүен дә билдәләп китте.

– Республика буйлап йөрөгәндә халыҡ боҙ һарайҙары төҙөүҙе һорай. Беҙ быйыл «Ишембай-Арена»ны астыҡ, ә икенсе йылға Октбярьскийҙа һалынасаҡ. Алла бирһә, Баймаҡта, Яңауылда шундай боҙ ареналары ҡалҡып сығасаҡ, – тине ул.

Хоккейсыларыбыҙ республика етәксеһенә матур уйындар күрһәтергә бар көстәрен һаласағын белдереп, уға хоккей формаһын һәм автографлы сәкән бүләк итте.

Әйткәндәй, «Салауат Юлаев» быйылғы хоккей миҙгелен 3 сентябрҙә Нур-Солтанда «Барыс» менән башлай. Ә үҙ боҙонда тәүге уйынын 9-ында «Спартак» (Мәскәү) менән үткәрә.

М. КӨЙӘРМӘНОВ.

Фото https://gorobzor.ru/ алынды.