Рәсәй төбәктәренә башҡорт теленән дәреслектәр еткерелә

20-21 августа Силәбе өлкәһендәге Сосновка, Сыбаркүл, Красноармейск, Ҡонашаҡ, Арғаяш райондарындағы, Силәбе ҡалаһындағы белем биреү учреждениеларына башҡорт теле һәм әҙәбиәте кабинеттары өсөн 8 комплект стенд, 3 мең 630 дана дәреслек, уҡыу ҡулланмаһы, башҡорт теле һәм әҙәбиәтенән эш дәфтәрҙәре, шулай уҡ мәктәп китапханалары өсөн нәфис әҙәбиәт алып барып еткерелде.

20 – 31 августа уҡыу-методик әҙәбиәтте Ырымбур өлкәһенең Ҡыуандыҡ, Төйлөгән, Һарыҡташ, Красногвардейск, Яңы Сергиевка, Александров райондары һәм Татарстан Республикаһының Ҡазан, Яр Саллы ҡалаларындағы белем биреү ойошмалары ла алды.

Әйтергә кәрәк, үткән уҡыу йылында республикабыҙҙан ситтәге 57 белем биреү учреждениеһында башҡорт теле өйрәнелде: Силәбелә – 39, Ырымбурҙа – 11, Ҡурған һәм Һамар өлкәләрендә – 3-әр, Һарытауҙа – 1. Рәсәй Федерацияһы төбәктәрендә башҡорт теле һәм әҙәбиәтен фән булараҡ 4 меңдән ашыу бала өйрәнә.

Фото: https://education.bashkortostan.ru/.