– Быуындан-быуынға күсеп килгән «Урал батыр» эпосы һәм Урал батырыбыҙ тыуған ерҙә бөрйәндәрҙең йәшәүе – ҙур мәртәбә. Республикабыҙҙың баш ҡалаһы сәхнәһендә үҙҙәрен танытҡан балаларыбыҙ менән ғорурланам. Бөгөн үҙ телебеҙҙә иҫ киткес юғары кимәлдә сығыш яһаны яҡташтарым, – тине Бөрйән районы хакимиәте башлығы Ғәзиз Манапов. – Беҙҙең балалар ҙа Урал батыр тыуған ерҙә йәшәй, шул һауаны һулай. Уларға бәхетле бала саҡ, матур киләсәк теләйем. Ә инде эпосты сәхнәгә сығарыу йәһәтенән иң ҙур рәхмәтемде Башҡортостандың халыҡ артисы, режиссёр Илнур Флүр улы Лоҡмановҡа белдерәм. Заман технологиялары менән һуғарылған тамаша барыбыҙҙы ла хайран итте.
Тамашасылар араһында Рәсәй Федерацияһының Дәүләт Думаһы депутаты Зариф Байғусҡаров, Башҡортостан Республикаһы Дәүләт Йыйылышы – Ҡоролтай депутаттары Айгиз Баймөхәмәтов, Рәмзиә Кәримова, Башҡортостан Республикаһы мәҙәниәт министры Әминә Шафиҡова, Башҡортостан Республикаһы Хакимиәтенең бүлек начальнигы Данир Йәғәфәровтар ҙа бар ине.
Йәш артистарыбыҙҙың иңдәренә ҡанат ҡуйыусы, һәр саҡ эпосты тәрән өйрәнеүгә дәртләндереп, ошо олуғ сарала ҡатнашыуға этәргес биреүсе Роза Ғүмәрованың өлөшө бик ҙур. Бөрйәнебеҙҙә был эш бер бөгөн генә башланмаған, бик оҙаҡ йылдар дауамында балалар баҡсаһының «Тәнәй Урал батырҙары»нан алып оло синыфтарғаса бәйләнешле алып барылған бик ҙур эш һөҙөмтәһе был.
Районда XXVII «Урал батыр» эпосын яттан һөйләүселәрҙең район конкурсы үткән апрель айында Өфөнән килгән ҡунаҡтар балаларҙың сағыу сығыштарына һоҡланып, баш ҡаланың ҙур сәхнәһендә күрһәтерлек тамаша, тип юғары баһалай. Шунан был тәҡдимде тормошҡа ашырыу юлдарын эҙләй башлай ҙа инде бөрйәндәр. Әлбиттә, бының өсөн район хакимиәте башлығы урынбаҫары Венера Вәлиева күп көс һалды.
Район мәғариф бүлеге начальнигы Илшат Сәйфетдинов менән район мәҙәниәт бүлеге начальнигы Клара Теләүбаеваларҙың ҡулға-ҡул тотоношоп эшләүҙәре һөҙөмтәһендә балаларҙың сығыштары бик сағыу булды. Районыбыҙҙың «Самрау» өлгөлө бейеүселәр ансамбле етәксеһе Наилә Нурдәүләтоваға ла рәхмәт. Тауыш операторы яуаплылығында эшләүсе Байназар ауыл мәҙәниәт йорто хеҙмәткәре, йырсы егет Артур Нәжметдинов, яҡтылыҡ операторы Таһир Йортбағышевтарҙың хеҙмәте баһалап бөткөһөҙ. Шулай итеп, күптәнге бер яҡты хыялыбыҙ тормошҡа ашты.
Илнур Лоҡмановтың балаларға теләге бер: "Артист уҡ булып китмәһәләр ҙә, шундай орлоҡ һалыу кәрәк, уларҙың күңеле саф һәм таҙа булһын! Иң ҙур бәхет ана шул. Әгәр ошо теләгебеҙгә ирешә алһаҡ, беҙ шат та, бәхетле лә буласаҡбыҙ", – ти ул.
Тамашасылар өсөн шулай уҡ эпосты тасуирлаған һәм райондағы ошо йүнәлештәге эҙмә-эҙлекле эште яҡтыртҡан фотозона, китап күргәҙмәләре, үҙенсәлекле сәйәхәт-әңгәмәләр әҙерләнгәйне. «Бөрйән районы энциклопедияһы», ҡулъяҙма китаптар, уҡыусыларҙың һәм өлкәндәрҙең «Минең ғаиләм энциклопедияһы» сағыу күргәҙмәләре һәр кемдең иғтибарын йәлеп итте.
Балаларға ҡаланың иҫтәлекле урындарына, музейҙарға онотолмаҫлыҡ сәйәхәттәр ҙә ойошторолдо. Уларҙың Шайморатов генерал һәйкәле янына барыуы, Милли музейҙа булыуы күңелдәрендә онотолмаҫлыҡ тәьҫораттар ҡалдырҙы. «Тамыр» балалар һәм үҫмерҙәр телестудияһында тапшырыуға төшөргә лә өлгөрҙөләр. Ныҡ күңелле булды!