Һау бул, балалар баҡсаһы!

«Сулпылар» һәм «Винтиктар» төркөмдәрендә ике күңелле тамаша үтте. Байрамды тәрбиәселәр тантаналы рәүештә асып ебәр­ҙе, матур, ҡупшы итеп кейен­гән сығарылыш балалары байрам түренән урын алды. Кескәйҙәр оҫта итеп шиғыр­ҙар һөйләне, йырланы, бейене. Төрлө уйындар уйнап, әкиәт сәхнәләштереп, үҙҙәренең белемдәрен күр­һәттеләр.
Балаларҙы ҡотларға әкиәт геройҙары – «Ялҡау», «Ике билдәһе», «Ошаҡлаусы», «Ҡабалансыҡ» та килгәйне. Улар шаян булыуҙары менән бар ҡунаҡтарҙың кәйефтәрен күтәрҙе. Мәктәптә нисек үҙеңде тоторға өйрәтеп, балаларға тик «дүртле» һәм «бишле» билдәләренә уҡыу­ҙарын теләп хушлаштылар. Байрам аҙағында ата-әсәләрҙе, балаларҙы ҡотлап, директор урынбаҫары Светлана Әсүәт ҡыҙы Кәримова үҙенең изге теләктәрен еткерҙе, Дипломдар, Рәхмәт хаттары тапшырҙы. Ата-әсәләр ҙә тәрбиәселәргә үҙҙәренең рәхмәттәрен белдереп, бүләктәрен таратты.
Балаларҙы алда күңелле, мауыҡтырғыс мәктәп тормошо көтә. Оҙаҡламай уларҙы еҙ ҡыңғырау тауыштары белем иленә саҡырыр. Осраған ҡаршылыҡтарҙы, һынауҙар­ҙы еңел үтергә насип бул­һын. Аҡ юл һеҙгә, ҡыҙҙар һәм малайҙар!

Гөлнара ТЕМИРОВА, музыка етәксеһе.
Өфө районы, Зубов ауылы.