-4 °С
Болотло
Бөтә яңылыҡтар
Һөйөнсө
22 Март 2019, 14:54
Тәүге Президентыбыҙға – Рәми Ғарипов исемендәге премия!
Рәми Ғарипов исемендәге 1-се республика башҡорт интернат-гимназияһында ла матур бер йола йәшәп килә. Быйыл да ул дауам ителеп, бөйөк шағирыбыҙҙың тормошо һәм ижади эшмәкәрлеге хаҡында фәнни хеҙмәттәр, әҫәрҙәр яҙған, милли мәғариф системаһын үҫтереүҙә ҙур өлөш индергән шәхестәргә, шулай уҡ белем усағы тормошонда әүҙем ҡатнашҡан, яҡшы уҡыған, олимпиада, конкурстарҙа, спорт өлкәһендә юғары уңыштарға өлгәшкән балаларға Рәми Ғарипов исемендәге премия тапшырыла. Уны 1994 йылда тәүгеләрҙән булып Рауил Бикбаев алһа, 1999 йылдан гимназия уҡыусыларына ла бирелә башлай.
Быйылғы юбилей йылында гимназия коллективы был әҙәби премияға алты кешене лайыҡ тип тапты. Кемдәрҙеме? Уҡыу йортоноң үҫешенә, материаль-техник базаһын нығытыуға ҙур өлөш индергән, һәр саҡ ярҙам ҡулы һуҙған Башҡортостан Республикаһының беренсе Президенты, «Урал» хәйриә фонды рәйесе Мортаза Рәхимовты, шағир исемен мәңгеләштереүгә күп көсөн һалған Рәсәйҙең мәғариф алдынғыһы, Башҡортостандың атҡаҙанған уҡытыусыһы, Рәсәй һәм Башҡортостан Журналистар союзы ағзаһы Булат Аҡмановты, Башҡортостандың атҡаҙанған уҡытыусыһы, мәғариф алдынғыһы, гимназияның башҡорт теле һәм әҙәбиәте уҡытыусыһы Гөлсәсәк Ҡылысованы.
Мортаза Ғөбәйҙулла улының был уҡыу йорто өсөн хәстәрлеген, изгелеген оноторлоҡ түгел. Ата-әсәләр, балалар, педагогик коллективтың хыялын тормошҡа ашырып, гимназияға өр-яңы бина һалдыра, спорт һөйөүселәргә ҙур бүләк яһап, «Шоңҡар» спорт комплексын төҙөтә.
Булат Ғайса улы, 40 йылдан ашыу уҡыусыларға математика фәненән белем биреү, директорҙың уҡыу-уҡытыу эштәре буйынса урынбаҫары булып эшләү менән бер рәттән, Ейәнсура районы Иҫәнғол ауылында бер урамға Рәми Ғарипов исемен биреү, Башҡортостандың халыҡ шағирына таҡтаташ асыуҙы хәстәрләй. Рәми Ғариповҡа арнап шиғри бәйгеләр, конференциялар ҙа ойоштороуға булышлыҡ итә.
Гөлсәсәк Салауат ҡыҙы йыл һайын шағирҙың әҙәби мираҫын өйрәнеүсе «Рәми уҡыуҙары»н үткәреүгә көс һала. Конференция материалдары, кисәләр, «түңәрәк өҫтәлдәр» буйынса йыйынтыҡтар туплау, «Интернатым – пар ҡанатым» гәзитен сығарыу ҙа – уның телде һаҡлау буйынса алып барылған эштәре.
Ә гимназия уҡыусыларынан Гөлиә Солтанова, Азамат Йомағужин, Илдус Кирановтар премия алып шатланды.
– Был премия – минең кескәй генә хеҙмәтемә оло баһа. Уны алыу ҙур яуаплылыҡ өҫтәй, алдағы көндәргә өмөт уята, дәрт бирә. Киләсәктә лә илебеҙҙең үҫешенә тос өлөш индерермен, тип уйлайым, – ти XI «Е» синыфы уҡыусыһы Гөлиә.
Ул – үҙе Сибай ҡалаһы ҡыҙы. Бында һигеҙенсе синыфтан алып белем ала, тик «бишле» билдәренә генә өлгәшә. «Аҡйондоҙ» халыҡ бейеүҙәре ансамбле солисткаһы ла. Бейеүҙән тыш, фәнни эшмәкәрлек менән дә мауыға. Былтыр Мәскәүҙә үткән халыҡ-ара конференцияла еңеү яулай, Бөтә Рәсәй олимпиадаһының республика этабында лингвистиканан призлы урын ала, төрлө юғары уҡыу йорттары үткәргән бәйгеләрҙә лә һынатмай. Гимназияла йыш ҡына «Айҙың иң яҡшы уҡыусыһы» исеменә лайыҡ булып тора.
XI «Д» синыфынан Азамат Йомағужинды бында химияны шәп белеүсе уҡыусы булараҡ маҡтайҙар. Ул был фәндән республика кимәлендә өс йыл рәттән призлы урындар ала. Спорт өлкәһендә лә егеткә тиңдәр юҡ, команда составында саңғы ярышы буйынса ҙур еңеүҙәр яулай.
XI «Е» синыфы уҡыусыһы Илдус Киранов та күптәргә өлгө булырлыҡ. Үҙен, бәлки, киләсәктә сәйәсмән итеп тә күрербеҙ әле. Ул белем усағында «бишле»гә генә уҡый. Төрлө олимпиадаларҙа ҡатнашып, призлы урындар ала. Еңел атлетика буйынса гимназия данын яҡлап, район, ҡала, республика кимәлендәге ярыштарҙан бер ҡасан да еңмәй ҡайтҡаны юҡ. Һәр ергә өлгөр егет футбол командаһы составында республика уйындарында ла һынатмай.
– Гимназия тормошо менән ҡайнап йәшәйем. Һәр үткәрелгән сараларҙа әүҙем ҡатнашам. КВН уйындарын бик яратам. Үҙебеҙ ҙә дуҫ егет менән команда төҙөп, сығыш яһайбыҙ. Шулай уҡ бында мин парламент дебаттарында ла үҙемде һынап ҡараным. Бик оҡшаны. Йыл һайын гимназияла президент һайлайҙар. Унда еңмәһәм дә, күп нәмәгә өйрәнеп алдым, – ти ул.
Быйылғы премияны тапшырыу тантанаһына мәртәбәле ҡунаҡтар – Бөтә донъя башҡорттары ҡоролтайы башҡарма комитеты рәйесе Данир Әхмәҙи улы Ғәйнуллин, шағирә, Шәйехзада Бабич исемендәге йәштәр дәүләт премияһы лауреаты Тәнзилә Дәүләтбирҙиналар ҙа килгәйне. Улар премияға лайыҡ булыусыларҙы ҡотлап, күңелдән сыҡҡан йылы һүҙҙәрен еткерҙе. Тантана «Аҡйондоҙ» халыҡ бейеүҙәре, Әҙеһәм Исҡужин исемендәге ҡурайсылар ансамбле, балаларҙың йыр-моңдары менән үрелеп барҙы.
Рәми Ғарипов исемендәге премияға лайыҡ булыусыларҙы беҙ ҙә ихлас ҡотлайбыҙ.
Гөлназ ШӘЙХЕТДИНОВА.
Өфө ҡалаһы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж