Ижад бәйгеһенең офоҡтары киңәйә

Алтын көҙҙөң сыуаҡ бер көнөндә Сибай интернат-гимназияһында республиканың төрлө район һәм ҡала мәктәптәренән килгән йәш ҡәләм тибрәтеүселәр йыйылды. Ҡасандыр ҡалабыҙҙа, аҙаҡ төбәктә, әле килеп республика кимәлендә Салауат Юлаев премияһы лауреаты һәм Башҡортостандың халыҡ яҙыу­сыһы Таңсулпан Ғарипова исемендәге призға уҙғарылған ижад бәйгеһе – уҡыусыларҙың иң көтөп алған байрамдарының береһе. Йыл һайын конкурста йөҙҙән ашыу бәйгесе ҡатнаша, китапсыҡтарын сығара, ташҡа яҙғандарын үҙ уҡыусыһына еткерә.

Ҡала конкурсынан – республика кимәленә

Бынан егерме ике йыл элек Сибайҙа «Ап-аҡ ҡарҙар» тип аталған ижад бәйгеһенең барлыҡҡа килеүе осраҡлы ғына була. Ул йылдарҙа Сибай төбәк яҙыусылар ойошмаһы етәксеһе Таңсулпан Ғарипова ҡаланың 10-сы мәктәбендә ижад түңәрәге алып бара. Шул йылда ни өсөндөр беҙҙә ҡар һуң яуа, декабрь буйына халыҡ аҡ ҡышты көтөп арый. Сираттағы ултырышта Таңсулпан Хизбулла ҡыҙы түңәрәк ағзалары менән бергәләп «Ап-аҡ ҡарҙар» исемле шиғыр сығара. Күмәкләшеп яҙған ижад емешен ҡат-ҡат уҡып, аҡ ҡарҙың яуыуын теләй­ҙәр. Хоҙайҙың ҡөҙрәтеме, ши­ғырҙың хикмәтеме, иртәгеһен ер өҫтө ап-аҡ була. Балалар шатлана, халыҡ ҡыуана. Шул саҡта Таңсулпан Ғарипова Сибай ҡала мәктәптәре уҡыусылары араһында ижади конкурс үткәрергә ҡарар ҡыла һәм ул «Ап-аҡ ҡарҙар» исеме менән атала. Әлбиттә, ҡатнашыусылар күп була.
Артабан тик ҡар, ҡыш, Яңы йыл, Ҡыш бабай, Ҡарһылыуға арналып яҙылған шиғырҙар тарыраҡ күренә һәм бәйге төрлө теманы алған конкурсҡа әүерелә. Проза, поэзия, публицис­тика буйынса уҡыусылар ижад итә, үҙҙәренең китапсыҡтарын сығара. Ул ваҡытта балаларҙың ижад емештәрен бик абруйлы баһалама ағзалары – яҙыусылар Гөлназ Ҡотоева, Зөһрә Фәйзуллина, Лира Яҡшыбаева, әҙәбиәт белгестәре, ғалимдар Ғәҙилә һәм Илдус Бүләковтар, Фәрүәз Сәйфуллиндар баһалай.
Йыл һайын уҙғарылған, хәҙер инде матур традицияға әйләнгән йәш ижадсылар бәйгеһенең төп маҡсаты – ҡалалағы йәш таланттарҙы үҫтереү өсөн өмөтлө ҡәләм тибрәтеүселәрҙе билдәләү, яңы исемдәр асыу, улар­ға ярҙам итеү, ижади йүнәлеш биреү. 2002 йылда ошо бәйге һөҙөмтәһе булып уҡыусылар­ҙың ижад емештәренән торған «Бала саҡтың яҡты хыялдары» исемле йыйынтыҡ донъя күрә. Унда 62 йәш авторҙың шиғыр­ҙары, әкиәттәре, хикәйәләре туплана, һәр әҫәр ижадсының күңел көҙгөһөн, рухи булмышын, хис-тойғо байлығын са­ғылдыра.
Сибай төбәк яҙыусылар ойошмаһы етәксеһе булып Гөлназ Ҡотоева тәғәйенләнгәс, был конкурс уның тәүге ойоштороусыһы, яҙыусы һәм драматург Таңсулпан Ғарипова исемендәге призға уҙғарыла башлай. Ә инде был сарала Таңсулпан апайҙың ҡатнашыуы, үҙе әҙерләгән приздарҙы еңеүселәргә тапшырыуы бәйгегә оло мәртәбә өҫтәй, уның бәҫен арттыра. Шуныһы иғтибарға лайыҡ: һуңғы йылдарҙа конкурс Сибай интернат-гимназияһы директоры Роза Бикбованың хәстәре һәм ярҙамы менән ошо белем усағында үтә һәм ул, үҙ географияһын киңәйтеп, Урал аръяғы райондары мәктәптәре уҡыусыларын да үҙенә туплай. 2015 йылдан беренсе тапҡыр төбәк-ара конкурс кимәлендә уҙғарыла. Шуны белеп ҡуйы­ғыҙ: Таңсулпан Хизбулла ҡыҙы – Сибай интернат-гимназияһы уҡыу­сыһы, уның почётлы ҡунағы.