+14 °С
Ясна
Бөтә яңылыҡтар
Беҙҙең мәктәптә
25 Декабрь 2020, 13:00
Интернатта нығый пар ҡанат
Күп күренекле шәхестәр тәрбиәләп үҫтергән Сибай интернат-гимназияһы 1961 йылда үҙ ишектәрен аса. 1972 йылда һигеҙ йыллыҡ мәктәп 10 йыллыҡҡа әүерелә, 1991 йылда 11 йыллыҡ итеп үҙгәртелә.
Юғары үрҙәргә өлгәшкән сығарылыш синыф уҡыусылары менән дә хаҡлы рәүештә ғорурланабыҙ. Беҙҙең гимназияны Башҡортостандың халыҡ артисткаһы Зифа Баязитова, Башҡортостандың халыҡ яҙыусыһы Таңсулпан Ғарипова, республикала ҙур танылыу яулап өлгөргән йырсылар Бибисара Азаматова, Гөлсөм Бикбулатова, Альберт Салауатовтар, химия фәндәре докторы, профессор Әхәт Мостафин, авиация подполковнигы, ике тапҡыр Ҡыҙыл Байраҡ ордены кавалеры Кәрим Кәшәфетдинов, Зәйнәб Биишева исемендәге «Китап» нәшриәте директоры Илһам Йәндәүләтовтар тамамлаған.
Әле беҙҙә Урал аръяғының Баймаҡ, Хәйбулла, Әбйәлил, Ейәнсура, Йылайыр, Бөрйән райондарынан һәм Бөтә донъя башҡорттары ҡоролтайы ҡарарҙарын бойомға ашырыу маҡсатында күрше Силәбе, Ырымбур өлкәләренән барлығы 300-гә яҡын бала белем һәм тәрбиә ала. Интернат-гимназияны тамамлағандар Өфө, Сибай, Магнитогорск, Силәбе, Санкт-Петербург, Мәскәү ҡалаларындағы уҡыу йорттарында уҡыуҙарын дауам итә.
Бына шулай беҙҙең гимназия үҙененең 60 йыллыҡ юбилейын матур ҡаҙаныштар менән ҡаршылай.
Донъяны һүҙ биҙәр
Уҡыусыларыбыҙҙың күбеһе, мәҫәлән, Әлфирә Сәғитова-Сынбулатова, Фәтих Мулләхмәтов, Гөлдәр Ишйәрова, Нурия Фәтхуллина, Салауат Заманов, Сәлиә Мөхәмәтғәлина, Гөлниса Сафиналар радио-телевидение журналистары булып китте. Гөлдәниә Һағынбаева, Гөлшат Исхаҡовалар Мостай Кәрим грантын алды. Гөлдәниә Һағынбаева, Сөмбөл Ыласынова, Лиана Сәғитовалар «Йәншишмә» гәзитенең йәш хәбәрселәре булып шатланды.
Тос фекерле, үткер ҡәләмле, сәмле ҡыҙҙар һәм егеттәр үҙҙәрен төрлө ижад бәйгеләрендә лә һынап ҡарай. Әҙәби түңәрәктә шөғөлләнеүселәр Мифтахетдин Аҡмулла исемендәге Башҡорт дәүләт педагогия университеты мәғариф министрлығы менән берлектә ойошторған йәш ижадсыларҙың «Илһам» конкурсында, «Баҫҡыстар» халыҡ-ара, Тансулпан Ғарипова призына республика бәйгеләрендә еңеүҙәр яулап тора.
Һөнәрлеләр күрһәтә һөнәрҙәрен
Интернат-гимназияла уҡыусыларға сәхнәлә үҙен нисек тоторға, ролдәрҙе башҡарғанда нисегерәк образға инергә, йәғни артист шөғөлөнә тәүҙә ҡурсаҡ түңәрәге етәксеһе Зөһрә Фәйзуллина өйрәтһә, аҙаҡ был эште башҡорт теле һәм әҙәбиәте уҡытыусыһы Минъямал Әшрәф ҡыҙы Әхмәтова дауам итә. Ә «Мираҫ» театр түңәрәген беренсе булып өлкән вожатый Гөлсинә Үҙәнбаева етәкләй, әле Гөлдәр Маликова коллектив менән уңышлы эшләп килә. Йәш актёрҙар «Йондоҙло юл» ҡала конкурс-фестивалендә Сәрүәр Суринаның халыҡ ижадына таянып яҙылған «Алтын балта» әкиәте менән уңышлы сығыш яһап, беренсе урын яулаһа, шул уҡ авторҙың Башҡортостандың халыҡ шағиры Мәжит Ғафури ижады буйынса яҙылған «Сыңрау торна ҡаурыйы» исемле драматик композицияһы менән өсөнсө урынға өлгәштеләр.
Үҙебеҙ – «Кендек», һәр ярыштабеҙ еңдек
Белем усағыбыҙҙың КВН командаһы 2007 йылда ойошторолғайны. Улар үҙҙәренә «Кендек» исемен һайлай. Тәүге йылдары Гөлназ Ҡаҙаҡбаева, Илнур Теләүкәевтәр оҫта ойоштороусылар булһа, уларҙың дәртле башланғысын Фәнзил Мулләхмәтов, Ғамир Нарбутин, Руслан Ғәлиевтәр кеүек шаян һүҙле, етеҙ, уй-хыялға бай шуҡ егеттәр дауам итә. Әле команданы Дим Илшат улы Ғүмәров етәкләй.
«Кендек»тәр Бәләбәй, Бөрө, Стәрлетамаҡ ҡалаларында уҙғарылған КВН уйындарында еңеүҙәргә ирешеп ҡайтты.
Дәртле дарманын табыр
Олатаһы Ғабдулла хәҙрәттең «Ҡумыҙ уйнап, ҡәүемдәрҙең күңелен күрегеҙ» тигән һүҙҙәрен балаларға еткереп, ҡалабыҙҙа дан яулаған «Яугел» ҡумыҙсылар ансамбленең етәксеһе Дилара Рафиҡова балаларға ҡумыҙҙа уйнау серҙәрен өйрәтә. Интернат-гимназия ҡумыҙсылары – Нургиз Шаһивәлиев, Денис Яхин, Гөлиә Илбулова, Гөлнәзирә Миҙәтова, Рушан Илбулов, Илмира Илназарова, Яҙгөл Ғәйетҡоловалар конкурстарҙа ла гелән беренселекте яулап тора.
Егеттәребеҙ Илмир Нәҙерғолов етәкләгән ҡурай түңәрәгендә ихлас шөғөлләнә. Ә Ғәзинур Нәҙерғолов, Салауат Яныбаев, Илгиз Ҡолһарин, Ғаяз Бикбулатов, Зәки Сыңғыҙовтар ҡурай бәйгеләрендә лә һынатмай, һәр байрамдың биҙәге лә улар.
Фәнүзә Мөхәмәтйәнова етәкләгән «Салтанат» өлгөлө бейеү ансамбле республика фестиваль-конкурсында «Ҡар һыуы», «Башҡорт казактары» бейеүҙәре менән – III, «Еҙ үксә» бишенсе республика конкурс-фестиваленең муниципаль этабында I урындарға лайыҡ була. Ә Денис Әхмәтов Ҡурған ҡалаһында үткән халыҡ-ара «Таланттар планетаһы» конкурс-фестивалендә «Ҡурайға мәдхиә», «Эх, күңелле йәш саҡтар» һәм «Игзаков» бейеүҙәре менән II урын ала.
Шуныһы ла иғтибарға лайыҡ: интернат-гимназиябыҙ директоры Роза Хаммат ҡыҙы Бикбова тарафынан был ансамбль һәм башҡа түңәрәктәр өсөн дә бөтә мөмкинлектәр булдырылды. Сағыу костюмдар тектерелде.
Сәләмәт тәндә – сәләмәт аҡыл
Йола тотҡан – хур булмаҫ
Гимназияла йолалар һаҡлау, тергеҙеү буйынса «Әүлиә» фольклор түңәрәге эшләп килә. «Аҡмулла вариҫтары», Хәйбулла, Миәкә, Бөрйән райондарында уҙған «Урал батыр» эпосын яттан һөйләү буйынса республика бәйгеләрендә минең һәм Зөлфиә Нуретдин ҡыҙы Ҡарасованың уҡыусылары ҙур еңеүҙәр яуланы. Ҡалабыҙҙа күрһәтелгән «Аҡһаҡал аманаты», «Һыу буйында» йолалары – Гран-при, «Ҡунаҡ ҡаршылау», «Белемлелек арыҫландай көслө…» тигәндәре I урындарға лайыҡ булды.
Һөнәре бар – күккә осор
Беҙҙең гимназияла Айҙар Рәжәп улы Йәнышев етәкләгән фәнни эштәр төркөмө лә төрлө конференцияларҙан призлы урындар алып ҡайта. Улар «Биишева уҡыуҙары», «Мостай уҡыуҙары», «Бикбай уҡыуҙары», «Ғарипов уҡыуҙары», «Вәлиди уҡыуҙары»нда ла һынатмай. Айгизә Әбдисова, Гөлдәр Ишйәрова, Айгүзәл Зианбаевалар Бәләкәй Фәндәр академияһында, Бөтә Рәсәй кимәлендәге конференцияларҙа уңыштар яуланы.
Гимназиябыҙҙа өс йүнәлештә әүҙем эш алып барылыуын да билдәләп үтергә кәрәк. Нурия Туйсина етәкләгән «Ирекмәндәр» мәрхәмәтле эштәре менән Бөтә Рәсәй конкурсында еңеү яуланы. Данил Рәшит улы Әбделғазиндың «Толпар» студияһы, Фәрит Биктимер улы Харрасовтың кадеттары ла уңышлы эшләп килә.
Республика кимәлендә 112-се Башҡорт атлы дивизияһына арналған һәм беҙҙең сығарылыш уҡыусыһы Таңсулпан Ғарипова призына ижад бәйгеләренең нәҡ беҙҙә үтеүе оло мәртәбә. Директорҙың тәрбиә эштәре буйынса урынбаҫары Марина Машалла ҡыҙы Хилалова был сараларға тәрән йөкмәтке һала, түңәрәк эштәренең һөҙөмтәле эшләүе өсөн бөтә мөмкинлектәр ҙә булдырырға тырыша.
Әлнисә АЛДЫРХАНОВА-КӘРИМОВА,
башҡорт теле һәм әҙәбиәте уҡытыусыһы.
Сибай интернат-гимназияһы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж