Бер көнө яҡташыбыҙға арналды

Беҙҙә лә үтте Балалар һәм үҫмерҙәр китабы аҙналығы. Уның барышында төрлө саралар ойошторолдо. Тәүгеһе – «Тыуған ере менән һоҡланыусы» тип аталған әҙәби кисә башҡорт яҙыусыһы, Белорет районының Баҡый ауылынан сығыусы яҡташыбыҙ Сабир Шәриповтың 70 йәшлек юбилейына арналды. Интернат-лицейҙа үткән был сараны Зөлфирә Сөләймәнованың «Сабир ағайға» шиғыры менән асып ебәрҙек. Уның биографияһы менән таныш­ҡандан һуң, ижад донъяһына бай­ҡау яһаныҡ. Бигерәк тә Байкал – Амур магистрален төҙөүҙә ҡатнашып, ундағы ваҡиғаларҙың эсендә ҡайнап, хәрби хеҙмәттән һуң яҙған «Хушлашмайым» романы ҡыҙыҡһыныу уятты, китапхананан алып уҡыясаҡбыҙ, тип килеште балалар.

Аҙналыҡтың икенсе көнөндә яҙыусы Фәрит Иҫәнғоловтың тормош юлы һәм ижады менән таныштырыу, донъяның матурлығын күрһәтеү маҡсатында «Бөйөк балалар яҙыусыһы» исемле тағы ла бер әҙәби кисә ошо белем усағы уҡыусылары өсөн үткәрелде. Сара барышында улар­ҙы китап күргәҙмәһе менән таныштырып, бер нисә әҫәренә туҡталып үттек.
25-се башҡорт балалар баҡсаһына бәләкәстәр менән осрашыуға ла барҙыҡ. Унда беҙ «Балалар китабы музейы» буйлап виртуаль сәйәхәткә юлландыҡ. Музейҙың һәр залында шиғыр һөйләү, йомаҡ сисеү, серле геройҙың ниндәй әкиәттән икәнен асыҡлау, бирелгән мәҡәлдең аҙағын бергәләп табыу кеүек эштәрҙе бик әүҙем башҡарҙыҡ. Уйындар ҙа уйнаныҡ, физкультминутҡа ла туҡталдыҡ. Йомаҡтар­ҙы сискәндән һуң кескәйҙәрҙе яңы китаптар менән таныштыр­ҙыҡ, ҡысҡырып уҡыу ойошторҙоҡ, әңгәмәләштек.
Быйыл танылған урыҫ яҙыу­сыһы Максим Горькийҙың тыуыуына 125 йыл тула. Уны иҫкә алыу маҡсатында 44-се балалар баҡсаһы тәрбиәләнеүселәре өсөн «Турғай» әкиәтенән өҙөк тә сәхнәләштерҙек. Был әҫәрҙә төп герой – Пудик исемле турғай балаһы үҙ һүҙле, тыңлау­һыҙ, шуҡ бала менән сағыштырыла. Ул һәр ваҡытта маһайып йөрөп, уйламағанда ҙур һары бесәй ауыҙына эләгә яҙа, инәһе генә уны ҡурсалап алып ҡала. Максим Горький әкиәте аша балаларға ҙур тормош һабағы бирелде.
Аҙналыҡтың һуңғы көнөндә интернат-лицейҙың II синыф уҡыу­сылары менән осрашып, таныл­ған урыҫ балалар яҙыусыһы Сергей Михалковтың ижады буйынса «Минең яратҡан бала саҡ китаптары» тип аталған библиографик дәрес уҙғарҙыҡ. Кескәйҙәр яҙыу­сының шиғырҙарын, мәҫәлдәрен уҡыны, викторина һорауҙарына әүҙем яуап бирҙе, йомаҡтар ҙа систе.

Белорет ҡалаһы.