+12 °С
Ямғыр
Бөтә яңылыҡтар
Беҙгә килгән хаттарҙан
12 Апрель 2019, 12:17
Мостай Кәрим көнө
Яҙҙың бер көнө миәкәләр өсөн Мостай Кәрим көнөнә әйләнде. Олоһо ла, кесеһе лә район үҙәк мәҙәниәт һарайында уҙған «Күкрәгемдән ҡоштар осорам» кисәһенә ашыҡты.
Бында килеп ингәс, фойела һүрәттәр, уҡыусыларҙың ҡул эштәренән күргәҙмә ҡуйылғайны. Бөйөк әҙипкә арналған гәзиттәр таратыла, уҡыусылар тарафынан конкурс өсөн эшләнгән видеороликтар күрһәтелә ине. Үҙәк китапхана хеҙмәткәрҙәре ойошторған китаптар мөйөшө лә бай йөкмәткелелеге менән байрамға килеүселәрҙе йәлеп итте.
Кисә сәхнәнән ҡурай моңо ағылыуы менән башланды. Байрамды алып барыусылар – Айнур Ғәзизуллин менән мәғариф бүлегенең телдәр буйынса методисы Рәмилә Батыршина барыһын да Мостай иленә әйҙәп алып китте. Был матур сарала йыл дауамында барған конкурс еңеүселәренә сығыш яһау бәхете тейҙе. Мостай Кәрим шиғырҙарын Йәнәби-Урсай башланғыс мәктәбенән Азалиә Ғималетдинова – башҡорт, Мәнәүезтамаҡтан Әлфинур Ғәббәсова – татар, Миәкәләге 1-се мәктәптән Ралина Мәғәсүмова – урыҫ, Яңы Ҡарамалынан Настя Маркова сыуаш телдәрендә һөйләп ишеттерҙе.
Миәкә районы мәктәптәре, Пионерҙар йорто, музыка, һынлы сәнғәт мәктәптәре уҡыусылары бөйөк шағирҙың ижадын өйрәнеп, конкурстарҙа ҡатнашты. Уларҙың иң яҡшы эштәре бөгөнгө күргәҙмәлә урын алды. Район хакимиәте башлығы Ришат Ғәбдрәшит улы Аҡтуғанов ошо турала әйтеп үтеп, бер төркөм уҡыусыларға Рәхмәт хаттарын тапшырҙы.
Хөрмәтле ветеран уҡытыусы, Рәсәй мәғариф алдынғыһы Кәбир Усман улы Ноғомановтың сығышын тулҡынланмайынса тыңлап булманы. «Донъяла эҙ ҡалдырырлыҡ шәхестәр була. Уларҙың ижади мираҫы ваҡыт йоғонтоһона ла бирешмәй. Шундайҙарҙың береһе – Мостай Кәрим. Уның тылсымлы ижады, төрлө-төрлө әҫәрҙәре бөтәбеҙгә билдәле. Беҙ – бәхетле быуын, бәхетле милләт. Халыҡты шәхестәр күтәрә. Башҡортто Мостай Кәрим бөтә донъяға танытты. Ғорур булып, уның рухына тап төшөрмәй йәшәйек», – тине ул.
Мостай Кәрим һүҙҙәренә композиторҙар әллә күпме матур матур йыр һәм башҡа музыкаль әҫәрҙәр ижад иткән. Кәүсәриә Әхмәҙуллина, Федан Шафиҡов, Йәмилә Ғиләжева, «Күгиҙел» ҡатын-ҡыҙҙар ансамбле уның йырҙарын күңелгә үтерлек итеп башҡарҙы. Тележурналист, Евразия телевидение һәм радио академияһының мөхбир ағзаһы, Шәһит Хоҙайбирҙин һәм Мәжит Ғафури исемендәге премиялар лауреаты Шәүрә Ғәббәс ҡыҙы Ғилманованың сығышы һоҡландырҙы.
Район мәҙәниәт йорто артистары сәхнәләштергән «Ҡыҙ урлау» комедияһынан өҙөк барыһының да күңеленә хуш килде. Илсеғол башҡорт гимназияһы уҡыусылары «Айгөл иле» драмаһынан өҙөк ҡуйып, ундағы кисерештәрҙе ысын артистарса күрһәтә алды. Тамъян-Таймаҫ мәктәбенән Наҙгөл Янышева әсәһе Гөлфиә Фәтих ҡыҙы менән хушлашыу монологын уйнағанда ла күңелдәр тулды. Илсеғол башҡорт гимназияһы уҡыусыһы Булат Илекәев һалдат кейемендә сәхнәгә сыҡҡас, алдыбыҙға Үлмәҫбай үҙе килеп баҫҡан һымаҡтойолдо. Байрамда шиғыр менән бергә йыр-бейеү үрелеп барҙы. Өлгөлө «Гөлдәр» балалар халыҡ бейеү ансамбле (етәксеһе – атҡаҙанған мәҙәниәт хеҙмәткәре Рәмилә Шәрипова) сығышын көслө алҡыштарға күмделәр.
Эйе, шағир беҙгә йомарт ҡояш, имен, бәрәкәтле ер, шулар менән бергә мәңге балҡыр шиғриәт һәм мөхәббәт ҡалдырҙы.
Зөһрә ЙӘНТҮРИНА.
Миәкә районы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж