Ауылыбыҙҙы ҡар тауы биҙәй

Ә бына Баҡса урамында йәшәүсе Эльвира Хәзиеваның балалары үҙҙәренең өйө алдында оло улы Вадимдың тәҡдиме менән ҡарҙан бик матур тау өйөп ҡатырған. Уның янына Ҡыш бабай менән Ҡарһылыуҙы, быйылғы йылдың символы – Һыйырҙы әүәләп ҡуйғандар. Матур Яңы йыл шыршыһы ла урын алған. Был ғаиләлә өс бала тәрбиәләнә. Улар бөтәһе лә Бәләбәй ҡалаһындағы башҡорт гимназияһында белем ала. Вадим IX синыфта тик «бишле» билдәләренә генә өлгәшә, ҡурайҙа уйнай, йырлай, бейей, баскетбол, көрәш секцияларына йөрөй. Гимназияла үткәрелгән барлыҡ саралар­ҙың да алып барыу­сыһы булып та­ныл­ған. Баш­ҡорт­остан юлдаш телевидениеһында тренингта ла ҡатнашҡаны бар. Наҙ­гөл IV синыфта уҡый, йырлар­ға, бейергә, һүрәт төшөрөргә әүәҫ. Икенселә белем алған Нәдиф тә ағаһы менән апа­һынан ҡалыш­май. Йырларға ла, бейергә лә оҫта, яҡшы уҡый, бигерәк тә ма­тематика дәрестәрен ярата. Шахмат буйынса ярышта ла алдын­ғылыҡты бирмәй икән.

Бына шул балалар бер ялға ҡайт­ҡан саҡтарында ҡарҙан тау яһай башлаған. Улар Бәләбәйгә уҡырға киткәс, эш туҡтап ҡалған. Шуға ла ҡышҡы каникул етеүгә өйҙәге өлкәндәр балаларға сюрприз яһарға булған. Бер көндө тауҙы үҙҙәре өйөп ҡуйған. Тирә-яғын матурлағандар. Ә инде балалар ҡайтҡас, бергәләп һындар әүәләп, шыршыны биҙәгәндәр. Тағы шуныһы маҡтауға лайыҡ: Вадим, Наҙгөл, Нәдиф үҙ-ара дежурлыҡ та ойошторған. Көн һайын берәү ҡар­ҙы көрәп, тауҙы һепереп, фигуралар­ҙы ҡарҙан таҙартып тора, тәртип һаҡлай.

Каникул буйы был матурлыҡҡа һоҡланырға, ҡар тауынан шыуып рәхәтләнергә башҡа урамдың балалары ла килә. Был изге башлан­ғыстары өсөн Вадимға, Наҙгөлгә һәм Нәдифкә бөтә ауыл кешеләре һәм ҡунаҡҡа ҡайтыусылар исеменән оло рәхмәт белдерәбеҙ. Уҡыу­ҙарында уңыштар һәм ныҡлы һаулыҡ теләйбеҙ.