Әлиә ҙур сәхнәлә уйнарға хыяллана

– Әлиә, һин үҙең ҡайһы яҡтан әле?
– Өфө ҡыҙымын.
– «Ялҡын»ға нисек эләктең ул?
– Бәләкәй саҡтан актриса булырға хыялланам. Шуға ла әсәйем мине гимназияға уҡырға алып килде. Быға ныҡ ҡыуанам. Ә «Ялҡын»ға кастинг аша үттем. Урыҫ телендә «Папе на фронт» тигән шиғырҙы һөйләп ишеттерҙем. Бер мәл Илнур Флүр улы:«Башҡортса беләһеңме?» – тип ҡыҙыҡһынды. Уның бар һорауҙарына башҡортса яуап бирҙем. Нимәләр һорағанын иҫләмәйем, сөнки ул мәлдә ныҡ тулҡынланғайным...
– Түңәрәктә шөғөлләнеү уҡыуыңа ҡамасауламаймы?
– Ауыр инде, тик ҡыйынлыҡтарға иғтибар итмәй, дәртләнеп йөрөйөм. Ә уҡы­уыма килгәндә, тик «бишле» билдәләренә генә өлгәшәм.
– Буш ваҡытың бармы? Булһа, нисек үткәрәһең?
– Юҡ тиерлек, күп ваҡытымды фортепьяно һәм аккордеонда башҡорт көй­ҙәрен өйрәнеүгә бүләм. Иң яратҡан көйөм – «Хәтирә». Конкурстар­ҙа ҡатнашып, призлы урын яуларға тырышам. Ял көндәрендә инглиз һәм француз телдәрен өйрәнәм, сөнки күп телдәр белеү хәтерҙе яҡшырта бит.
– Ҡала ҡыҙы булһаң да, ҡалай башҡорт телендә матур һөйләшәһең?
– Бәләкәйҙән Архангел районының Аҙау ауылында йәшәгән олатайым һәм өләсәйемдәргә йыш ҡайтып йөрөнөм. Өләсәйем миңә һәр ваҡыт шиғыр, әкиәттәр һөйләне. Олатайым ике йәшемдә үк хәреф танырға өйрәтте. «Дүрт йәшеңдә уҡып киттең», – тип һөйләй әсәйем. Балалар баҡсаһына йөрөй башлағас та ул көн һайын йоҡлар алдынан әкиәт уҡый торғайны. Шулай әсәйем туған телемә һөйөү уятты. Ә мәктәпкә уҡырға барғас, бабайым Ринат Сөләймәнов төрлө кисәләргә мине шиғыр һөйләтергә алып йөрөнө. Беҙ өйҙә ҡус­тым менән гел башҡортса аралашабыҙ. Әсәйем дә башҡорт теле һәм тарих фәндәре уҡытыусыһы булғас, өйҙәге мөхит тә тәьҫир итәлер, тип уйлайым.
– Әйткәндәй, Башҡортостандың төрлө райондарында спектакль ҡуйып та йөрөй­һөгөҙ, буғай...
– Эйе, беҙ күптән түгел Дәүләкән районында Михаил Бартеневтың «Мин бишкә тиклем һанайым» әкиәте менән йөрөп ҡайттыҡ.
– Кем ролендә булдың?
– Тәлмәрйен. Мин «р» өнө урынына «л» өнөн әйтеп һөйләшәм әкиәттә. Ныҡ оҡшай ошо ролде уйнау.
– Бөгөн ниндәй маҡсат менән йәшәй­һең?
– Булған ваҡытымды бушҡа үткәрмәҫкә, күберәк белергә, уҡырға һәм хыялланған теләктәремде тормошҡа ашырыр өсөн бар мөмкинлекте файҙаланыр­ға тырышам.
– Тағы ла ниндәй яратҡан шөғөлөң бар?
– Беҙ өйҙә ташбаҡа аҫрайбыҙ. Уның исеме – Эмилли. Мин уны тәрбиәләп, ашатырға яратам. Аҙна һайын әсәйем менән зоомагазинға барып, тәмлекәстәр алабыҙ. Бигерәк тә банан, салат, кишер ашарға ярата. Аҙнаһына бер тапҡыр йыуындырам, йәй көндәре – тышта, ә ҡыш көнө өйҙә йөрөтөп, хәрәкәтләндереп торам.
Мин «Хужа Насретдин мәҙәктәре» китабын ҡабат-ҡабат ҡулыма алам. Уны Әхмәт Сәйфуллин тәржемә иткән. Данила ҡустыма ла ҡысҡырып уҡыһам, көлгән була. Ә былай ул башҡортса шиғыр, әкиәттәр һөйләһәң, иҫе китеп тыңлай. Әле уға 2 йәш кенә булһа ла, бигерәк теремек. Йырҙар өйрәтһәм, тиҙ генә отоп ала. Үҙе лә йырларға һәм бейергә маташа. Әле уға әлифбаны өйрәтеп бөтөп киләм.
– Ҡалай маладисһың! Үҙ тиңдәштәреңә ниндәй теләктәр әйтерһең?
– Ҡыйынлыҡтар алдында юғалып ҡалмаҫҡа, тик алға ынтылыу кәрәк. Донъя именлеге, туғандарыбыҙҙың һау-сәләмәт булыуын теләйем.
Тағы ла ошо форсаттан сығып, ҙур рәхмәттәремде Илнур Флүр улына, Альбина Фәүзетдин ҡыҙына, Ринат Риф улына, уҡытыусыларыма, дуҫтарыма һәм иң яҡындарыма әйтер инем.
– Рәхмәт, Әлиә! Хыялдарың тормошҡа ашһын!

Зөһрә ХӘКИМОВА әңгәмәләште.