«Аҡмулла шишмәһе» ҡоромаһын!

Шағир ҙа күп ерҙә, йырсы ла күп,

Тик Аҡмулла берҙән-бер бит ул.

Быуаттарҙан алып быуаттарға

Нурҙар сәсеп торор ир бит ул.

Яҡтылыҡ йырсыһы Аҡмулла мәңге халыҡ күңелендә. Йыл һайын республика, район кимәлендә «Аҡмулла уҡыуҙары», «Аҡмулла вариҫтары», «Аҡмулла шишмәһе» кеүек бәйгеләр үткәрелеп тора. Уларҙан беҙҙең тамъян-таймаҫтар ҙа ситтә ҡалғаны юҡ. Мәктәбебеҙҙә бөйөк мәғрифәтсегә арналған бик күп саралар уҙғарҙыҡ. Уҡыусылар Аҡмулланың тормошон һәм ижадын сағылдырған фәнни-эҙләнеү эштәре менән сығыш яһаны, уның шиғырҙарын һөйләне. Үҙҙәре ижад иткән шиғырҙарҙы ла уҡып ишеттерҙеләр. Иң яҡшы тип табылған эштәр район уҡыу­сылары араһында уҙғарылған «Аҡмулла шишмәһе» конкурсына ебәрелде. Наҙгөл Янышева, Әмилә Әхмәтвәлиева, Аделина Ғәлишина, Раксана Базарова, Айзат Латипов һәм Гүзәл менән Данил Иҙрисовтар уңышлы сығыш яһап, Маҡтау ҡағыҙы менән бүләкләнде. Булат Ғатаул­лин шағир-мәғрифәтсегә арнап эшләгән видеоролигы менән икенсе урын яуланы.

Һеҙҙең иғтибарға уҡыусыларҙың ижад емештәрен тәҡдим итәбеҙ.

Миәкә районы, Тамъян-Таймаҫ мәктәбе.

Бөйөк шағир – Аҡмулла,

Йәшәй минең йөрәктә.

Шатланамын, сөнки ул

Тыуған ошо төйәктә.

Яҡын үткер булмышы,

Нәсихәте-кәңәше.

Ялҡынлы шиғырҙары

Һәм башҡарған һәр эше.

Аҡмулла – бөйөк сәсән,

Данлаған ул тыуған еремде.

Аманат итеп ҡалдырған

Ғәзиз башҡорт телемде.

Белгән ул төрлө телдәрҙе,

Бик күп илдәрҙә булған.

Ярлыларҙың балаһына

Аҡыл-ғилем таратҡан.

Һинең даның һис кем юя алмаҫ,

Нәсихәтең беҙгә кәрәкле.

Ул, ҡыҙҙарың уҡып туя алмай,

Һоҡландыра бөтә ғаләмде.

Ғорурланам, тыуған ерем,

Һиндә тыуып үҫкәнгә.

Дим буйында һыуҙар инеп,

Шишмә һыуын эскәнгә.

Аҡмуллабыҙ, яҡташыбыҙ,

Данланы ошо ерҙе.

Аманат булып яңғырай

Наҙанлыҡҡа ҡаршы һүҙе.

Бик көслө булған уның

Яҡтылыҡҡа ынтылышы.

Шуның өсөн сит яҡтарға

Алып киткән яҙмышы.

Үгәй әсәй ҡыйырһытҡас,

Киткән ул далаларға.

Аң-белемдәр таратҡан

Ундағы балаларға.

Изге эшең онотолманы,

Ғаләмдәргә өндәй ялҡыны.

Ҡараңғы төндә яҡты йондоҙ булып,

Тыуған еребеҙҙә балҡыны.

Мең һигеҙ йөҙ утыҙ берҙә,

Һалҡын ҡыштың таңында,

Башҡорт ерен данларға

Тыуған беҙҙең Аҡмулла.

Бик зирәк бала булып,

Үҫеп буйҙар еткергән.

Белем алып мәҙрәсәлә,

Донъя гиҙергә киткән.

Бик аҡыллы ул булған,

Күп шиғырҙар ул яҙған.

Бөйөк шағир, сәсән булып

Бар донъяға бер булған.

Раксана БАЗАРОВА, VI синыф уҡыусыһы.

«Башҡорттарым,уҡыу кәрәк!» –

Аҡмулланың һүҙҙәре.

Уның өгөт-нәсихәте

Бөгөн дә бик фәһемле.

Сал быуаттар аша үткән

Шиғриәте-аманат.

Аҡмулла нәсихәтенә

Сығармабыҙ яманат!

Аҡмулла кеүек беҙ ҙә

Уҡып белем алырбыҙ.

Үҙебеҙҙең илебеҙҙә

Кәрәк кеше булырбыҙ.