-6 °С
Болотло
Бөтә яңылыҡтар
Хеҙмәт сиреге
23 Август 2019, 15:06
Иң яҡшы мәктәп баҡсаһы
Темәс ауылында ла, йәйге каникул булыуына ҡарамаҫтан, мәктәп яны баҡсаһында көн һайын эштәр гөрләй генә. Баҡсала сиратлап V – XI синыфтар үҙҙәренең етәкселәре менән йәшелсә, сәскәләргә һыу ҡоя, түтәлдәрҙәге ҡый үләндәрен йолҡа ине. Шулай уҡ мәктәп баҡсаһының мөдире Гөлгөнә Марат ҡыҙы Халиҡова етәкселегендә үҫемлектәр менән төрлө тәжрибә лә үткәрәләр икән. Балалар йәшелсәләрҙән ҡайһы осраҡта мул уңыш алып булыуын, ниндәй айҙа үҫентене күсереп ултыртырға һәм башҡа баҡса серҙәрен өйрәнеп үҫә. Үҙҙәренә тормошта кәрәкле мәғлүмәт туплайҙар.
Ысынлап та, Темәс мәктәбенең баҡсаһы бик шәп! Ҡыяр, сөгөлдөр, кишер, кәбеҫтә, ҡабаҡ, ашҡабаҡ, картуф емерелеп уңған. Помидор, борос, баклажандары һабағында бешеп, бына-бына өҙөлөп төшөргә генә тора! Ә сәскәләрҙең төрлөлөгө! Хатта күҙҙәр ҡамаша... Килеп ингәс тә үк бар ерҙә лә бөхтәлек, таҙалыҡ күҙгә ташлана. Етәксе Марат Юлай улы Әүәлбаевтың булдыҡлы, уңған, өлгөр икәнлеге һиҙелә. Әйткәндәй, «Йәншишмә»беҙ ойошторған «Изгелек» акцияһы башланыу менән мәктәп уҡытыусылары ла уға дәррәү ҡушылғайны. Бының өсөн директорҙың тәрбиәүи эштәр буйынса урынбаҫары Зилә Минзаһит ҡыҙы Әхмәтҡужинаға рәхмәт әйтәбеҙ. Афарин, темәстәр!
Өс гектарҙан ашыу мәктәп яны участкаһының бер генә мөйөшөн дә ҡый баҫмаған, һәр буш ер файҙаланылған. Әле яңыраҡ мәктәптәрҙең яңы уҡыу йылына әҙерлеген тикшереүсе район комиссияһы ла быны билдәләп үткән, баҡсаның уңышын юғары баһалаған. Әйтеп үтергә кәрәк: әлеге баҡса беренсе йыл түгел, ә бер нисә тиҫтә йыл дауамында уңышлы эшләп килә. Район буйынса үткәрелгән «Иң яҡшы мәктәп баҡсаһы» исемле конкурста гел беренселекте яулап торалар! Был, әлбиттә, уҡытыусыларҙың, баҡса етәксеһенең, уҡыусыларҙың берҙәм хеҙмәт һөҙөмтәһе!
– Баҡсаның мул уңышының бер өлөшөн һатып, аҡсаһына теплицаға яңы япма, биҙрә, көрәк, гөл һауыттары һәм башҡа баҡсаға кәрәкле эш ҡоралдары алһаҡ, икенсе өлөшөн көҙ мәктәп ашханаһында балаларҙы ашатыу өсөн ҡалдырабыҙ. Әлбиттә, баҡсала үҫтерелгән йәшелсә биш йөҙҙән ашыу уҡыусыға йыл буйына ашатыуға етмәй. Шулай ҙа тырышабыҙ, көҙ айҙарында витаминлы аштар ашау барыбер файҙалы инде, – тип һөйләй Зилә Минзаһит ҡыҙы.
Баҡсала гөж килеп эшләп йөрөгән уҡыусыларҙың үҙҙәрен дә тыңлайыҡ әле.
Юлдаш ИҘЕБАЕВ, Варис ҒӘНИЕВ (VI «Б» синыф):
– Беҙ баҡсаға бер көн дә ҡалдырмай йөрөнөк. Ҡоролоҡ булғас, көн дә түтәлдәргә һыу һиптек.
Айлина НУРМӨХӘМӘТОВА (VII «В» синыф):
– Быйыл үҙемдең синыфым эшләгән ваҡытта лагерҙа булып ҡалғайным, икенселәр менән йөрөргә тура килде. Бер ҙә үкенмәйем. Ауыр түгел. Миңә сәскәләрҙе тәрбиәләү оҡшаны.
Вадим ВИЛДАНОВ (VII «А» синыф):
– Мин икенсе ауылда олатай менән өләсәйҙә ял итһәм дә, баҡсала эшләргә ваҡыт еткәс, ҡайта һалдым. Бында күңелле, синыфташтарым менән аралашам. Күмәкләшеп бар эште лә «һә» тигәнсе эшләйбеҙ ҙә ҡуябыҙ.
Рената АЛТЫНБАЕВА (VII «А» синыф):
– Шатланып баҡсаға килдем. Эй, синыфташтарымды һағынғайным. Һөйләшеп йөрөп эшләгәс, ике сәғәт ваҡыттың үткәнен дә һиҙмәй ҡалаһың. Баҡсабыҙ матур, сәскәләргә иҫең китерлек!
Бына шулай Темәс мәктәбенең иң егәрле уҡыусылары иртүк тороп, каникулының ун көнөн мәктәп баҡсаһында үткәрә: тәжрибә туплай, эшкә өйрәнә, дуҫтары менән күрешә, эшенең һөҙөмтәһенә ҡыуана. Шул уҡ ваҡытта үҙҙәренә витаминлы ризыҡ та хәстәрләй тырыш балалар. Маладистар! Тирләп эшләһәң, тәмләп ашарһың, тиҙәр бит.
Зөһрә ХӘКИМОВА.
Баймаҡ районы.
Читайте нас:
Редакция һайлауы
Новости партнеров
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж