Карантин, тип тормайбыҙ

Яңыраҡ билдәле шағир, Башҡортостандың Яҙыусылар союзы ағзаһы Ҡадир Әлибаевтың тыуыуына 80 йыл тулыу уңайынан «Бала саҡ донъяһы» тип исемләнгән онлайн әҙәби-шиғри кисә үткәрҙек. Ысын таланттар һәр заманда ла ил улдары һәм ил ҡыҙҙары булып таныла, ижад юлында ла ҙур ҡа­һарманлыҡтар күрһәтә. Эйе, ысынлап та, балалар яҙыусылары ниндәй генә китаптар яҙмай йәш быуын өсөн?! Балалар өсөн генә түгел, ә ололар өсөн дә күп шиғыр йыйынтыҡтары менән беҙгә таныш Ҡадир Әлибаев. Ололар­ҙы ла, балаларҙы ла уның китаптары менән таныштырып, байҡау яһап үтелде.

Был кисәне йәмләп, беҙҙең 25-се башҡорт балалар баҡсаһының «Еләк» исемле уртансылар төркөмөндә тәрбиәләнеүсе кескәй дуҫтарыбыҙ Ҡадир Әлибаевтың балалар өсөн яҙған «Күңелле иртә» китабына сәйәхәткә юлланды. Улар шағирҙың шиғырҙарын һөйләп үтте, «Ҡояшлы йәйғор ятты» исемле шиғырына тәрбиәсе апайҙары Регина Хәниф ҡыҙы Мөхәмәт­йәнова менән бергәләп асфальтҡа һүрәт тә эшләп ҡуйҙы. Кисәбеҙҙе дауам итеп, Фәриха Нәҙербай ҡыҙы Вәлиуллина үҙенең Ҡадир Әлибаев менән осрашыу иҫтәлектәре менән уртаҡлашты. Китапхана хеҙмәткәрҙәре, Сосновка ауылынан Земфира Кәримова уның шиғырҙарын уҡып ишеттерҙе. Шулай уҡ шағирҙың тыуған ауылында таҡтаташ асылыу ваҡиғаһы менән дә китап һөйөүселәрҙе таныштыр­ҙыҡ, видеояҙмалар ҡараныҡ. Урал Мәхмүтов – «Бесәй балаһы», Рияз Солтанов – «Шишмә аға», Әҙилә Шакирова «Ҡояш­лы йәйғор ятты» шиғырҙа­рын яттан һөйләп ишеттерҙе.

Беҙ ойошторған сараларҙа ҡатнашыусыларға, уларҙы әҙерләп алып барыусы китапхана хеҙмәткәрҙәре Гөлназ Мостафинаға, Зилә Теләмбитоваға рәхмәт һүҙҙәрен еткерәм. Китапханаларға каникул юҡ. Беҙ уҡыусыларыбыҙ менән йәйебеҙҙе ҡыҙыҡлы үткәрәбеҙ.