Сәйлән теҙә тырыш ҡыҙҙар

Интернет селтәрендә беләҙек-йөҙөктәр эшләүҙең ниндәй генә ысулын өйрәтмәйҙәр – теләгәнеңде һайла. Тәүҙә үҙҙәре өсөн генә аксессуар­ҙар яһаһалар, һуңынан синыфташтарына тәҡдим итеп ҡарайҙар.
– Әхирәттәребеҙ һатып ала башлағас, дәрт, ҡомар уянды. Үҙебеҙ эшләгән тауарҙан да аҡса йыйып була икән дә, тигән уйға килдек, – ти Камилә.
Ҡыҙҙар урамдағы тиҫтерҙәренә йөҙөк, муйынсаҡ, телефонға брелок, алҡа, беләҙек алып сығып күрһәтеп, беренсе көндә ярайһы ғына аҡса эшләй. Уларға ошо шөғөл менән ҡыҙыҡһыныусы әхирәттәре Рания Фазлетдинова ла ҡушыла.
– Кемдер шунда уҡ, юҡ, кәрәкмәй, тип артабан ки­тә. Икенселәр һайлап ала, тағы заказ бирә. Хатта олораҡ апайҙар ҙа. Социаль селтәрҙәге каналыбыҙға яҙылыусылар байтаҡ, би­ҙәүестәр хаҡында йылы һүҙҙәр яҙып ҡалдыралар, уңыштар теләйҙәр, – ти Сафина.
Иң ҙур сумма ниндәй булды, тип ҡыҙыҡһынам. «Бер көндө икебеҙгә өс меңдән ашыу эшләнек», – ти апалы-һеңлеле Хәлиловалар. Ә нимәгә тотоналар аҡсаларын, тиеүселәргә, әрәм-шәрәм итмәйҙәр, тип әйтер инем. Үҙҙәренә кәрәк-яраҡ һәм яңынан сәйлән алыуҙан тыш, бүләк бирешергә яраталар. Мәҫәлән, апаһының тыуған көнөнә Сафина яҡшы ҡолаҡсындар алған. Алла бирһә, велосипедҡа ла аҡса йыйырбыҙ, ти ҡыҙҙар.
Әйткәндәй, өс әхирәт уҡыу­ҙа ла һынатмай. Камилә менән Сафина – 16-сы гимназияның алтынсы һәм бишенсе, Рания 108-се мәктәптең бишенсе синыфын яҡшы билдәләргә генә тамамланы.
Был ҡыҙҙарға уңыштар ғына теләйһе ҡала.

Зөләйха ВӘЛИУЛЛИНА.
Өфө ҡалаһы.