Урамдың үҙ талаптары

Нисек уйлайһың, дуҫым, әсәй кеше урынлы борсоламы? Нисек һине, донъялағы иң ҡәҙерле кешене, бәлә-ҡазаларҙан ҡурсаларға икән? Нисек һинең бараһы юлдарыңа һалам ғына ла түгел, яҫтыҡтар түшәп сығырға һуң? Абынып ҡолаһаң да, йомшаҡҡа ғына төшөр инең, имгәнмәҫ инең, эйе бит? Ата-әсәләр үҙ балалары өсөн ошолайыраҡ итеп борсола һәм был аңлашылалыр, шулаймы? Әммә бөтәһенең тик үҙ ғәзиздәрен ҡайғыртып ҡына ултырырға мөмкинлектәре юҡ. Ә, бәлки, был яҡшылыр ҙа, килешәһеңме? Һин бит хәҙер ҙурһың, балалар баҡсаһынан күптән оло тормошҡа сыҡтың! Тимәк, ҡайһы бер хәлдәр өсөн аңлы рәүештә үҙең дә яуап бирерлекһең!

Әйҙә, иң ябайы – юл ҡағиҙәләренән башлайыҡ. Һин уларҙы беләһең һәм те­үәл үтәйһең, тимәк, маладисһың. Артабан – мәктәптә генә түгел, хатта өйөңдә лә ниндәйҙер һин генә атҡара торған мөһим эштәр бар – уларҙы «һә» тигәнсе башҡараһың. Тағы ла афарин! Автобус булһынмы йәки йәмәғәт урынымы (ашха­на, кафе, туҡталыштар) – һәр ерҙә лә үҙеңде тотоу ҡағиҙәләре теркәлгән. Улар­ҙы боҙһаң, хоҡуҡ һаҡлау органдары вәкил­дәре тарафынан яза аласаҡһың. Ни өсөн? Сөнки беҙ хоҡуҡи илдә йәшәйбеҙ!

Урамдың да, шикһеҙ, кешеләргә үҙ талаптары бар. Ундағы иң ҡәтғи ҡанун – комендант сәғәте. Ул һине бәләләрҙән, яман компанияларҙан, эскелектән, көсләүҙәрҙән аралау өсөн индерелгән. Нәҡ кис һәм төнөн балаларға ҡарата ҡылынған енәйәттәрҙең артыуын күҙаллап, комендант сәғәте булдырылды ла инде. Беҙ, ололар, һине һаҡлау һәм яҡлау өсөн бар көсөбөҙҙө һалабыҙ, әммә ниндәйҙер ҡот осҡос хәлдәр булып ҡына тора, шулаймы? Тимәк, профилактик эш, йәғни иҫкәртеүҙәр, тик бер яҡлы ғына булырға тейеш түгелдер. Тимәк, һин дә үҙеңдең хәүефһеҙлегең тураһында уйланырға бурыслыһың. Мәҡәлә башында миҫал итеп килтерелгән ғаиләләге ҡыҙ саҡырған кешенең машинаһына ултырмаған, малай дуҫтарының һуғышына ҡыҫылмаған. Унан да бигерәк был хәл тураһында борсолоуҙарын ололарға еткергәндәр, ә улары, үҙ сиратында, балаларының ҙурайыуын һәм ҙур ҡаланың ҡыҙы, улы өсөн хәүефһеҙ түгел икәнен аңланы.