-7 °С
Ҡар
Бөтә яңылыҡтар
"Рәхмәт һиңә, уҡытыусым!"
9 Октябрь 2020, 17:39
Тәүге уҡытыусыларым
Әлеге көндә мин Рауил мәктәбендә башҡорт теле һәм әҙәбиәте уҡытыусыһы булып эшләйем.
Был яратҡан һөнәремде һайлап, мәктәптә эшләүемә 30 йыл ваҡыт үтеп тә киткән. Байтаҡ ҡына уҡыусыларым «Йәншишмә» гәзите, «Аманат» журналы менән дуҫ булдылар, әле лә яҙышалар һәм төрлө конкурстарҙа ҡатнашып, призлы урындар яулап торалар. Күптәре ошо балалар баҫмаларының «Йәш хәбәрсе» исемен алды. Шулай уҡ башҡорт теле буйынса юғары уҡыу йорттарында уҡып йөрөүсе уҡыусыларым да бар. Бына улар: Динара Ғәлләмова, Лилиә Солтанова, Филүзә Уйылданова, Айнура Сиреүбаева, Земфира Ғәлимовалар. Шундай уҡыусыларым булғанға ҡыуанып бөтә алмайым һәм башҡорт теленә һөйөү тәрбиәләүҙә минең дә өлөшөм барҙыр, тип уйлайым.
Ә бит ҡасандыр, бик күп йылдар элек, үҙем дә уҡыусы булып, парта артында ултыра инем. Ошо мәктәптә уҡыған йылдарым күҙ алдына килеп, уҡытыусыларым бер-бер артлы иҫемә төштөләр.
Минең беренсе уҡытыусым Фәйрүзә Ғиниәт ҡыҙы Хәлилова булды. Ул тәү башлап уҡырға-яҙырға өйрәтте. Дәрестәре бик ҡыҙыҡлы үтә торғайны. Мандолинала уйнауы, төрлө диафильмдар ҡаратыуы, хеҙмәт дәресендә аҡ туҡымаға төҫлө ептәр менән сәскәләр сигергә өйрәтеүе әле лә хәтеремдә.
Белем иленә тәү башлап етәкләп индереүсе, бәләкәй уҡыусыларының күңел донъяһында һөйөүҙе үҙенең алсаҡлығы менән яулап алыусы уҡытыусым, етмәһә, үҙемдең еңгәйем дә ине. Ул бер тапҡыр математиканан өйгә эшемде эшләмәгән өсөн дәрестән һуң алып ҡалды. Мин ҡушылған эште үтәмәнем, дәфтәр битен тултырғансы ҙур алма һүрәте эшләп бирҙем. Ул: «Ярай, бар ҡайт, бынан былай өйгә эшеңде эшләмәй йөрөмә», – тип ҡайтарып ебәргәйне.
Башланғыс синыфты тамамлағас, өс саҡрым алыҫлыҡтағы Ишҡол урта мәктәбенә барҙым. Бында бик мөләйем, матур ғына Фатима Динислам ҡыҙы Зекрина апай ҡаршы алды. Беҙгә, балаларға, иң ҡыҙығы уның «яға»ны – «яҡа», «тәрилкә»не «тәрлинкә» тип әйтеүе ине. Ул Әлшәй районынан булғанға шулай һөйләшкән икән. Фатима Динислам ҡыҙы урта мәктәпте тамамлағансы беҙҙең синыф етәксеһе булды һәм математиканан уҡытты. Тәү ҡарауға йомшаҡ күңелле булып күренгән остазыбыҙ бик талапсан да ине, шуға ла үҙ фәненән төплө белем биреүгә һәм беҙҙе кеше итеп тәрбиәләүгә өлгәште.
Башҡорт әҙәбиәтенән мәктәп директоры Рәфҡәт Ильяс улы Мәхийәнов уҡытты. Ул беҙҙе бер тапҡыр ҙа әрләмәне: тыныс холоҡло, аҡыллы ғына ағай ине. Уның саф башҡортса һөйләп, матур итеп дәрес алып барыуын ҡырҡҡа яҡын бала шым ғына тыңлап ултыра торғайныҡ. Башҡорт теленә булған һөйөүҙе яратҡан уҡытыусым Рәфҡәт Ильяс улы һәм мине башҡорт теленән уҡытҡан Рәсимә Насип ҡыҙы уятты, тиһәм, һис тә хата булмаҫ. Уларға күңелем түрендә мәңгелек рәхмәт тойғоһо йөрөтәм.
Ҡыҙғанысҡа ҡаршы, Рәфҡәт Ильяс улы баҡыйлыҡҡа күскәненә байтаҡ йылдар үтте. Шулай уҡ миңә белем биргән урыҫ теле һәм әҙәбиәте уҡытыусыһы Мохтар Мөхәмәҙиә улы Хәсәнов, физика уҡытыусыһы Мир Хәмзә улы Ҡаһарманов, астрономия уҡытыусыһы Йомадил Йәнғәзи улы Зекрин, тарих уҡытыусыһы Хәфизә Әхиәр ҡыҙы Шәһәрғәзиналар ҙа иҫән түгелдәр. Уларҙы ла мәңге онотмам.
Уҡытыусы эше еңел түгел. Әммә был һөнәрҙе һайлауыма бер ҙә үкенмәйем.
Гүзәл ӘХМӘҘИЕВА.
Әбйәлил районы,
Рауил ауылы.
Читайте нас:
Редакция һайлауы
Новости партнеров
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж