+11 °С
Болотло
TelegramVKOK
Бөтә яңылыҡтар
Светофор
13 Сентябрь 2019, 13:54

Урам аша һаҡ атлайым, Ҡыҙыл төҫкә сыҡмайым

Яуапһыҙлыҡмы, битарафлыҡмы, нимә тип атарға һуң быны? Балалар автокреслоһы тураһында һүҙебеҙ.

Эйе, элек юлда йөрөгәндә уларҙы ҡулланмай торғайнылар, бөтөнләй юҡ инеләр. Әммә заманалар үҙгәрә. Бөгөн автомобилдәр күбәйҙе. Юл-транспорт фажиғәләре тураһында көн дә ишетелеп тора. Берәй авария була ҡалһа, балаларҙың автокреслола ултырыуҙары күп бәләнән ҡот­ҡарып ҡалыуы тураһында ЮХХДИ хеҙмәткәрҙәре иҫкәртеп тора. Һаман да быны аңламаусылар бар. Ҡайһы бер ата-әсәләр бәләкәстәрен алдарына ултыртып йөрөүҙәрен дауам итә. Йә булмаһа юл хәрәкәте инспекторҙары тикшергәндә генә автокреслола йөрөтөүселәр осрай. Балаларҙың хә­үефһеҙлеген уйлап та бирмәй­ҙәр.

Яңыраҡ Өфөлә бер атай иҫерек килеш юғары тиҙлектә автомобилендә ағасҡа барып бәрелә, беренселә уҡы­ған улы­ның ғүмере ҡыйыла... Малайын автокреслоға ултыртмаған булған... Ниндәй ҡай­ғы! Ниндәй аң­һыҙ үлем. Ниңә атайҙар эскән килеш руль артына ултыра икән? Ҡыҙғанысҡа ҡаршы, ундайҙар бихисап: рейдтар ваҡытында әллә күп­ме иҫерек тотолоп, штраф һалына.

Әле бына уҡыуҙар башланды. Уҡыусылар, һәр ваҡыт юл ҡағиҙәләрен үтәргә, мәктәпкә барғанда хәүефһеҙерәк юлды һайларға кәрәк. Юл аша сыҡҡанда, һеҙҙең өсөн светофорҙың йәшел уты янһа ла, тәүҙә машина килмәүенә инанығыҙ. Тәүлектең ҡараңғы ваҡытында кейемегеҙҙә йәки портфелегеҙҙә яҡтылыҡты кире ҡайтарыусы элементтар булырға тейеш. Был водителдәргә һеҙҙе йыраҡтан уҡ күрергә мөмкинлек бирәсәк.

Әйҙәгеҙ, юлда иғтибарлы булайыҡ, һаҡланып ҡына йөрөйөк. Өлкәндәр кескәйҙәргә өлгө күр­һәтһен ине. Бигерәк тә юл аша сыҡҡан саҡта.
Читайте нас: