+12 °С
Ямғыр
Бөтә яңылыҡтар
Тәбиғәт мөйөшө
7 Август 2020, 14:47
Фәхретдин олатайҙың шөғөлөн ейәне дауам итә
9 август – Башҡортостан умартасылары көнө Бөгөнгө заманда умартасы ғаиләләрҙең күп булыуы ҡыуандыра ла, һоҡландыра ла. Шундайҙарҙың береһе – Әйүповтар, үҙебеҙҙең бал ҡорттарын үрсетеүсе ғаилә булараҡ, районыбыҙҙа һәм республикабыҙҙа дан тота. Атай нигеҙенең йылыһын, данын дауам итеп Рәшит ағай улдарына һәм ҡыҙҙарына ҡортсолоҡтоң барлыҡ серҙәрен өйрәтергә тырыша. Улар ғаиләләре менән «Бөрйән даны – башҡорт балы» байрамында ҡатнашып, оло еңеүҙәргә лә ирешеп өлгөрҙө.
Әлеге көндә уларҙың ихатаһында барлығы 10-дан ашыу умарта бар. Ғаилә башлығы ундағы барлыҡ эште өлкән улы Фаилға ышанып тапшырып ҡуйған. 1972 йылдан алып бал ҡорттары тотҡан, үрсеткән Фәхретдин олатайҙың шөғөлөн ейәндәре дауам итеүе оло ҡыуаныс.
Фаил Әйүпов X синыфты ғына тамамлауына ҡарамаҫтан, бик тырыш, булдыҡлы егет. Уҡыуҙан тыш, спортта ла һынатмай. Синыфташым ат сабышы ярышында өсөнсө урын яулап ҡыуандырҙы. Көрәш, баскетбол, волейбол, хоккей буйынса ла әүҙем ул. Умартасылыҡ буйынса ла күпте белгәне күренеп тора. Мин уға ҡыҙыҡһындырған бер нисә һорауымды бирҙем.
– Бал ҡортоноң наҙы бар, тиҙәр. Фаил, ҡәҙерләп, һаҡлап көткән бал ҡорттарығыҙҙы нисек тәрбиәләйһегеҙ?
– Бәләкәй саҡтан уҡ атайым менән әсәйемдең умарта ҡарағанын, бал айыртҡанын күҙәтергә яраттым. Ә хәҙер инде шул эштәрҙе үҙем тулыһынса башҡарам тиергә лә була. Олатайымдан ҡалған ҡомартҡы эш ҡоралдары әле лә өр-яңы кеүек. Беҙ ғаиләбеҙ менән йәйенә бер нисә тапҡыр бал алабыҙ. Бер умартанан яҡынса 5 банка, әгәр йыл уңышлы килһә, унан да күберәк табыш сыға.
Умартасының эше йыл әйләнәһенә лә бөтмәй. Ул бер бал айыртып алыуға ғына ҡайтып ҡалмай, ә ҡорттар өсөн умарталар, рамдар эшләү ҙә мәшәҡәтле генә. Был ағас эше тирәһендә миңә атайым да, Әҡсән ағайым да ярҙам итә. Ололарҙың кәңәштәрен тыңлап, умартасылыҡ серҙәрен өйрәнәм мин.
– Миҙгеленә күпме бал алаһығыҙ? Уны ашауға ғына тотонаһығыҙмы?
– Сер итеп кенә әйтәм, 3 литрлыҡ банкалар менән 100 – 130-ға етә торғайны. Табыштың яртыһын ҡорттарҙың үҙҙәренә ҡалдырабыҙ, ә ҡалғанын айыртып алабыҙ. Уның күпселеген һатабыҙ. Беҙҙең балды Мәскәү, Ырымбур яҡтарынан да килеп алалар.
Балдың да төрлөһө була, мәҫәлән, саған балы менән бәпембә балын иртә яҙҙан уҡ ҡыуҙырып алабыҙ. Йәй уртаһында йүкә менән сәскәнеке була. Бигерәк тә йүкә балын һораусылар күп.
– Ә табыш алыуҙың сере нимәлә тип уйлайһың?
– Бер ниндәй ҙә сере юҡ. Ҡорт көтә башлағандан алып иғтибарлы булырға кәрәк. Уларҙы ла бит бала кеүек тәрбиәләмәйенсә, үҙе үрсеп, бал йыймай.
Бына бит нисек! Ауылда эш, аҡса юҡ тигәндәргә ең һыҙғанып донъя көтөүсе алты балалы Әйүповтар, уларҙың эшен дауам итеүсе Фаил өлгө булып тора. Уңған ғаиләгә уңыштар ғына теләп ҡалам.
Заһиҙә МОРАТШИНА.
Бөрйән районы, Мораҙым ауылы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж