Иң-иң ҡоштар

Оса белмәгән иң ҙур ҡош – дөйәғош. Уның ҡарауы, шәп йүгерә ул – сәғәтенә 70 саҡрымға тиклем араны үтә ала. Ауырлығына килгәндә, дөйәғош 170 килограмға етә, бейеклеге – 270 сантиметр. Шулай ауыр булғанға, йәнә ҡанаттары үҫешеп етмәгәнгә оса алмай ул. Ә бына оҙон аяҡтары менән ҙур януарҙы үлтерергә һәләтле.
Иң ҙур осар ҡош – күркә. Эйе, ул күктә осоп йөрөмәй, әммә ҡыҫҡа араны еңел генә үтә ала. Шуға ла хужалыҡта күркәнең ҡанаттарын аҙыраҡ ҡырҡып ҡуялар. Юғиһә, ихатанан осоп сығып китер! Әйткәндәй, был йорт ҡошо 39 ки­лограмға тиклем үҫә ала.
Иң етеҙ ҡош булып сапсан һанала. Юҡҡа ғына электропоезды уның исеме менән атамағандар! Сапсандың уртаса тиҙлеге – сәғәтенә 322 саҡрым.
Иң бәләкәй ҡош колибри икәнен ишеткәнегеҙ барҙыр. Ҡанаттары секундына 90 тапҡыр елпенә ала һәм был бал ҡорто безелдәүенә оҡшаш тауыш сығара. Тик беҙ быны күрмәйбеҙ тиерлек – Кубала йәшәүсе төрөнөң ҙурлығы 6 сантиметрҙан артмай. Ҡалған ерҙәрҙә ҙурыраҡтары ла осрай.
Тирә-йүндәгеләр өсөн иң ныҡ хәүеф тыуҙы­рыусы ҡош – казуар, өҫтәүенә, ҙурлығы буйынса ла икенсе урында тора ул. Матур ғына, тип ҡарап торорға ярамай – кешегә ташланырға күп һорамай, имеш. Казуарға көслө аяҡтары ярҙамға килә. Ҡасып та ҡотолоп булмай: сәғәтенә 50 саҡрымды үтә ала ул.