Салауат юлдары буйлап

Салауат Юлаевтың тыуыуына 250 йыл тулыу айҡанлы, 2004 йылда республикабыҙҙың бер төркөм журналистары Эстонияның Палдиски ҡалаһында, Рогервик нығытмаһында бул­ғайны. Әле бына яңыраҡ милләттәштәребеҙ Салауат батыр һәм уның атаһы Юлай Аҙналиндың эҙҙәре буйлап тағы ла юлға сыҡты.

Баш­ҡортостан Кинематографтар союзының «Салауат юлдары буйлап» тигән проекты Рәсәй Президенты грантына лайыҡ булып, уның етәксеһе Фәрит Ғәбитов, тарихи консультант, ғалим Мирас Иҙелбаев, режиссёр Таңсулпан Бураҡаева, сценарий авторы Зөһрә Бураҡаева, композитор Урал Иҙелбаев, оператор Илсур Ишәев, директорҙар Гөлнур Ильясова һәм Гөлфиә Шәрипова, ҡурайсы Рус­лан Мөлөковтарҙан тор­ған ижади төркөм Эстонияға китте. Уларҙың юлдары Мин­зәлә, Ҡазан, Чебоксар, Түбәнге Новгород, Владимир, Мәскәү, Тверь, Бөйөк Новгород, Псков, Тарту һәм Таллин ҡалалары аша үтә. Һәр туҡталышта халыҡ менән осрашып, сығыштар яһау, Салауат Юлаев тураһында фильмдар күрһәтеү, милли күргәҙмә ойоштороу ҡаралған. Сәйәхәт алдынан Салауат батырҙың тыуған ауылына барып, бер ус туп­раҡ алдылар. Алла бирһә, 15 – 16 июндә Палдиски ҡалаһында буласаҡтар.
16 июндә – милли батырыбыҙ Салауат Юлаевтың тыуған көнөн билдәләү өсөн махсус рәүештә бында танылған ҡурайсы Роберт Юлдашев та килеп етәсәк. Ә беҙ «Салауат юлдары буйлап» тигән документаль фильм­дың төшөрөлөп бөтөүен тү­ҙемһеҙлек менән көтәбеҙ.