-8 °С
Болотло
TelegramТестарVKOK
Бөтә яңылыҡтар
Төрлөһөнән
17 Апрель 2020, 14:28

Герман оҫталыҡ дәресе лә үткәрә

Беҙҙең киләсәгебеҙ алдынғы ҡарашлы, ҡуйған маҡсаттарына ҡыйыу барған, алдынғы заман технологияларын яҡшы белгән йәштәр ҡулында. Шундайҙарҙың береһе – баш ҡалабыҙҙың 35-се мәктәбендә X синыфта уҡыусы Герман ЙӘНҒӘЛИН.

Уның исемен, бәлки, күптәрегеҙ ишетеп тә беләлер. Егет республика, Рәсәй кимәлендәге техник йүнәлешле бәйгеләрҙә йыш ҡатнашып, призлы урындар яулай. «Аҡыллы ҡала», «Алдынғы етештереүсе технологиялар» йүнәлештәре буйынса Милли технологик башланғыс олимпиадаларының финалисы,«Реактор» инженер проекттары Бөтә Рәсәй конкурсы, Өфө дәүләт нефть техник университетының «Нефть кухняһы» Бөтә Рәсәй инженер мәктәбе һәм күп төрлө төбәк ярыштары еңеүсеһе лә булды ул. Уңыштары өсөн «Артек» халыҡ-ара, «Орлёнок» Бөтә Рәсәй балалар үҙәктәрендә техник йүнәлешле сменаларҙа ял итеү бәхете лә тейгән.

– Етенсе синыфта уҡығанда «Йондоҙсоҡ» лагерында «Autodesk 123Design» программаһы буйынса курс үттем. Бер мәл атайым ҡыҙыҡһыныуымды күреп, 3D принтер бүләк итте. Был ҡоролманы өйҙә үҙләштереп бөткәс, уны тулыраҡ өйрәнгем килеп, синыфташымдың һәм атайымдың кәңәше буйынса «Кванториум» балалар технопаркына килдем. Бында сәнәғәт дизайны, электроника, робот техникаһы һәм программалау менән өс йыл шөғөлләнәм. Сәнәғәт дизайны педагогы Айгөл Дәминева миңә ныҡ ярҙам итте. Уның менән бергәләп күп проекттарҙы тормошҡа ашыр­ҙыҡ, олимпиадаларҙа ҡатнаштыҡ, – ти зирәк егет.

Үҙизоляция мәлендә Герман Йәнғәлин инде хәҙер үҙе йәштәрҙең остазына әйләнгән. Ул Stepik белем биреү платформаһында инновацион уҡыу курстары булдырып, онлайн-лекциялар алып бара. Уларҙы Рәсәй уҡыусылары ғына түгел, студенттар ҙа мауығып ҡарай.

– Тәүҙә Компас-3D-v17 буйынса мәғлүмәтле курсымды бушлай үтергә https://stepik.org/course/63060/promo тәҡдим итәм. Ул компас ҡына түгел, лазер һәм фрезерлы станоктар, 3D модель әҙерләү өсөн башҡа программалар буйынса ла. Проектлау, электроника һәм проекттар буйынса минең ютуб-каналымды https://www.youtube.com/c/GermanNanoengineer ҡарай алаһығыҙ. Бында миңә 300-гә яҡын кеше яҙылған. Белем биреү буйынса хеҙмәттәшлек итергә, бушлай лекциялар уҡырға әҙермен. Минең бындай тәжрибәм бар инде. 3D технологиялар https://www.youtube.com/watch?v=pYz8orju7cc&feature=youtu.be һәм квадрокоптерҙар буйынса https://www.youtube.com/watch?v=yFWZMMkCCWM&feature=youtu.be оҫталыҡ дәрестәре алып барҙым. Яңыраҡ робот техникаһынан онлайн-уҡыу ойошторҙом. Рәсәйҙең төрлө төбәктәрендә йәшәүсе уҡыусылар өсөн фәнни-техник төркөмөмдө https://vk.com/nanoengineer2035 һәм техник ярҙамы булған сайтымды http://germannanoengineer.tilda.ws/ булдырҙым. Бында теләгән кеше инеп, белем биреү материалдарын үҙләштерә ала, – ти егет, теләүселәрҙе файҙалы фәндәрҙе өйрәнергә саҡырып.

Әйткәндәй, Герман Йәнғәлиндең ситтән тороп уҡыу лицейы ла бар. Унда бишенсе синыфтан балалар уҡый ала, ти.

Шундай аҡыллы егеттең киләсәккә уй-хыялдары ла бик ҙур. Ул донъяны яҡшыға үҙгәртә алырлыҡ компания булдырырға ниәтләй. Был йүнәлештә эшен башлаған да инде, тик уны әлегә сер итеп һаҡлай. Ни өсөн тигәндә, ошоноң буйынса патент юллау менән мәшғүл әле. Бынан тыш, ул мәктәпте тамамлағас, Бауман исемендәге Мәскәү дәүләт техник университетына йә булмаһа сит илдә уҡыу теләге менән дә яна.

Афариндан башҡа ни әйтәһең инде был егеткә! Ул күптәргә өлгө булып тора. Бәлки, киләсәктә донъя кимәлендә ҙур асыштар ҙа яһар әле. Һынатма, Герман!


Гөлназ ШӘЙХЕТДИНОВА.

Өфө ҡалаһы.

Читайте нас в