-6 °С
Болотло
Бөтә яңылыҡтар
Төрлөһөнән
26 Февраль 2021, 13:33
Батырйән, Ынйы, Матур, Иҫәнбай Иҫәновтар
Белеп ҡуйығыҙ, был бәхетле балалар – Баймаҡ ҡалаһында Иҫәновтарҙың ҙур, матур, татыу ғаиләһенең йәме, ҡото. Күркәм исемле, аҡыллы, теремек, тәрбиәле үҙҙәре.
Борон башҡорттарҙа сабыйға оҙон исем ҡушырға тырышҡандар. Ошо йоланы һаҡлап, баланың ғүмере лә оҙон һәм бәхетле булһын, тип ғаиләләге дүрт балаға ла атай менән әсәй матур башҡорт исемдәре ҡушҡан.
Яратып-көтөп алынған баш балаға – иң өлкән улдарына Батырйән тип ҡушалар. Батыр, ҡыйыу егеттең дуҫтары күп булһын, тормошта ҙур уңыштарға өлгәшһен, тип изге ниәттәр менән сабыйға шундай исем һайлай яҡындары. Батырйән, ысынлап та, батыр йәнле бала: әлеге мәлдә иң төп эше – уҡыуҙа һынатмай, спортты ярата. Әле ул ҡалалағы 2-се мәктәптең өсөнсө синыфында белем ала. Ә инде олимпиадаларҙа призлы урындар яулауы – уҡыусы өсөн үҙе үк ҙур батырлыҡ! Өйҙә – атаһының уң ҡанаты, терәге, әсәһенең – беренсе ярҙамсыһы. Батырйән моңло бала – йырларға ла әүәҫ ул.
Ғаиләгә тағы ла бәхет, ырыҫ арттырып, ҡыҙҙары тыуа. Ата-әсәһе уға Ынйы тигән нәзәкәтле башҡорт исемен ҡуша. Ҡыҙыҡай – әлеге көндә икенсе синыф уҡыусыһы, уҡыу алдынғыһы. Затлы мәрйен кеүек ныҡ, ауырыуҙарға бирешмәһен, ынйы сәскәһе кеүек наҙлыҡай ғына, кешеләргә миһырбанлы булһын, тигән уй-ниәт менән ошо исемде биргәндәр. Ынйыҡай ағаһынан ҡалышмай: спорт менән дә ихлас шөғөлләнә, бейергә лә ярата.
Өсөнсө баланың исемен оҙаҡ ҡына һайлай атай менән әсәй. Тулған айҙай һылыу йөҙлө, төймәләй генә танаулы матур бәпәйгә бер исем дә килешмәгән кеүек тойола. Үҙе матур булғас, исеме лә шулай булһын, тип һылыуҡайға ата-әсәһе ҡарт өләсәһенең исемен ҡуша. Матурҡай әле балалар баҡсаһына йөрөй. Ағаһына, апаһына эйәреп, улар ятлаған шиғырҙарҙы тиҙ генә отоп ала, йырларға, бейергә килештерә. Ҡустыһы Иҫәнбайға күҙ ҙә ҡолаҡ. Уныһын ҡурсалап ҡына тора, бер минутҡа ла янынан китмәҫкә тырыша. Ә әлегә кинйәләре Иҫәнбай Иҫәновтар фамилияһына нигеҙ һалыусы етенсе быуын олатаһының исемен йөрөтә. Уның исеме иҫән-һау һәм бай булһын, тигән теләк мәғәнәһенә эйә.
Рәсәй гвардияһының «Һаҡсы» ойошмаһында эшләүсе ғаилә башлығы Артур Заһир улының эштән ҡайтыуын түҙемһеҙлек менән көтөп ала балалары. Ҡулы ла ифрат оҫта аталарының. Ағастан төрлө һындар, һандыҡтар һәм башҡа төрлө әйберҙәр эшләй. Йәшәгән йорттары, ихаталары хас та әкиәт илен хәтерләтә: өйгөс, төрлө һындар, хатта башҡорт тирмәһе ҡороп ултыртҡан атайҙары. Сәскә үҫтереү өсөн матур-матур һауыттарҙы ла ғаилә башлығы үҙ ҡулдары менән эшләгән. Батырйән күберәк атаһы янында өйрөлә, ағас менән эшләү серҙәренә өйрәнә. Бергәләп яһаған бик күп ҡул эштәре төрлө конкурстарҙа призлы урындар яулаған.
Әсәләре – ҡала дауаханаһында шәфҡәт туташы. Ул ҡул эштәренә маһир, матурлыҡ ярата, шуға ла күпләп сәскәләр үҫтерә. Ҡыҙҙар ҙа уға эйәреп, сәскәләр тәрбиәләй, бәйләү, ҡул эштәре менән шөғөлләнә. Ҡала ерендә йәшәһәләр ҙә, һөт кәзәләре, йорт ҡуяндары аҫрайҙар. Ҡыҙҙар кәзә һауа, бергәләшеп ҡуяндар тәрбиәләйҙәр, йәй көндәре әсәләренә баҡса эшендә ярҙамлашалар. Күмәкләгәс, эш тә ырай. Эш бөткәс, татыу ғаилә күңелле ял да итә.
Балаларҙың барыһы ла йыр-бейеүгә оҫта. Бейеү, фольклор түңәрәктәренә йөрөйҙәр. Улар район, республика кимәлендә үткән бик күп бәйге еңеүселәре: «Таҡмаҡ-батл» республика, Баймаҡ телевидениеһы үткәргән «Мобиль репортёр» конкурстарында беренсе урын ала, «Атай менән бергә оҫталайбыҙ», «Минең хыялымдағы ихата», Башҡорт ҡоролтайы үткәргән «Башҡорт ғаиләһе – 2019» ярыштары еңеүселәре.
Бөтөн был сараларға балаларҙы әйҙәүсе, дәртләндереүсе – атай менән әсәйҙәре. Үҙ көстәре менән төрлө бәйгегә әҙерләүсе лә улар. Балалар зирәк, өйрәткәнде бик тиҙ отоп ала. Аталары – һөнәре буйынса физкультура уҡытыусыһы. Шуның өсөн дә ғаиләлә физик тәрбиәгә ныҡлы иғтибар бирелә. Бергәләп походтарға йөрөйҙәр, спорт менән әүҙем шөғөлләнәләр.
Еңеүҙәр балаларҙы дәртләндерә, яңы үрҙәргә әйҙәй. Саф башҡорт исемдәрен йөрөткән был татыу балалар бөгөн дә төрлө конкурстарҙа ҡатнашып, призлы урындар яулап тора. Уларҙың исемдәре лә, үҙҙәре лә бик шәп!
Зөбәржәт ЯҠУПОВА.
Баймаҡ ҡалаһы.
Читайте нас:
Редакция һайлауы
Новости партнеров
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж