Смартфонды дөрөҫ ҡуллан!

Ысынлап та, йәнең теләгән нәмәне интернет киңлегенән бер нисә секундта табырға була: рецептар, яңылыҡтар, фотолар, кәңәш­тәр, адрестар... Видеобәйләнеш аша иһә меңәр саҡрым алыҫлыҡтағы дуҫың менән эргәлә ултырғандай аралаша ала­һың. Атай-әсәйҙәрегеҙ коммуналь түләүҙәрҙе фатирҙан сыҡмай ғына башҡара. Олатай-өләсәйеңдең хәлен белергә телә­һәң, рәхим ит. Ә онлайн курс­тар һуң? Аҡсаңды күсерәһең дә йылы өйҙә генә яңы һөнәргә өйрәнәһең.
Шулай ҙа смартфондың зарары ла күп икән. Мәҫәлән, текәлеп тик ултырып, арҡа ауырта. Ә һеҙгә, йәш дуҫтарыбыҙ, хәрәкәт итеү мотлаҡ. Экрандағы күренештәр күҙҙе лә арыта. Ваҡ хәрефтәр һәм рәсемдәр бәләкәстәр өсөн түгел. Иғтибар ит­һәгеҙ, китаптарығыҙҙа ла яҙыу­ҙар эре итеп бирелә бит.
Смартфондан күҙгә төшкән яҡтылыҡ йоҡо режимын боҙа. Организм был яҡтылыҡты көн тип ҡабул итә, шуға ла карауат­ҡа ятҡас, телефонды ҡулға алыу­ҙан тыйылып тороғоҙ. Зарядкала ла ҡалдырырға ярамай, янғын сығып китеүе бар.
Аккумуляторы эшләгән смарт­фон тирә-яҡҡа бик көслө нурҙар ебәреп тора икән. Кеҫәлә ятҡан бәйләнеш сараһы айырым күҙәнәктәргә бешергән кеүек зарар килтерә һәм хромосомаларҙың төҙөлөшөн боҙа. Кеше быны һиҙ­мәй. Шул нурҙар тәьҫиренән яман шеш барлыҡҡа килеү ҡур­ҡынысы арта. Сәләмәтлегегеҙ­ҙе ҡайғыртһағыҙ, телефонды ке­ҫәлә йөрөтмәҫкә һәм уның аша оҙаҡ һөйләшмәҫкә тырышығыҙ.
Бер генә кеше файҙаланһа ла, телефондар таҙа түгел. Улар­ҙың өҫтөндә зарарлы микробтар бик күп. Һөйләшкәндә приборҙы биткә, ҡолаҡҡа терәп тот­һаң, тирелә бетсәләр килеп сы­ғыуы мөмкин. Аҡса тотҡас, ҡулды йыуырға кәрәк бит, телефон менән дә шулай эшләү зарур. Дуҫтар, һаулығыбыҙ – үҙ ҡулыбыҙҙа!

Нәсимә һәм Марат ХӘЙҘӘРОВТАР,
юғары категориялы табиптар.
Өфө ҡалаһы.

Фото: yandex.ru.