Беритәк – Берәтәк

Йәй һайын әсәйемдең тыу­ған ауылына бармай ҡалмайбыҙ. Берәтәктә Нөгөш һәм Берәтәк йылғалары бар, улар ҡушылған урын Күкьятыу тип атала. Миңә иң оҡшағаны – шунда һыу инеү. Таулы-урманлы тәбиғәте ныҡ матур. Ауылдың тарихын тарих уҡытыу­сы­һы Вәли бабай Ғүмәров яҙып алған, ти әсәйем. Мин дә был турала интернеттан уҡыным.

Күрше Аҫҡар ауылында йәшәгән Аҫҡар ҡарттың Арыҫлан­ғол исемле улының ҡыҙы Айбикә еләккә киткәндән юғала. Тау һыртында шартый бигерәк уңған була. Еләк йыйып йөрөй торғас, ҡараһалар, Айбикә юҡ. Уны таба алмағас, ҡайтып киткәндәр. Эҙләргә һыбайлылар сыҡҡан. Шулай йөрөй торғас, йылғаға килеп еткәндәр. Ағай-эне кәңәшләшеп, һыу буйын эҙләгәндәр. Бара торғас, йыл­ға ситендәге тамырҙа эләгеп торған сепрәкте күреп ҡал­ғандар. Был Айбикәнең күлдәк итәге булған. Һыбайлылар йыл­ға түбәненә сапҡан һәм оло һыуға килеп сыҡҡан. Ул Оло Нөгөш икән. Эҙләүселәр шул урында туҡтаған, ҡыҙҙы тапмаҫтарын аңлағандар инде. «Бахыр Айбикәнең бер итәге генә тороп ҡалды», – тип уфтанған атаһы. Шунан һуң ҡыҙҙың күлдәк итәге табылған йылғаны Бер итәк йылғаһы тип атағандар, һуңынан Беритәк – Берәтәк тип ҡалыплашҡан.
Ә Айбикә юғалған урынды Айбикә тауы тип йөрөтәләр. Һуңынан Берәтәк йылғаһы тамағына Ташлы, Ҡурғашлы, Бикташ, Аҫҡар яҡтарынан күп кенә ғаиләләр күсеп ултырған. Ауылға йылға исемен ҡушҡандар. Ошо дәүерҙән бирле уны Берәтәк тиҙәр.

Өфө ҡалаһы, Мостай Кәрим исемендәге 158-се башҡорт гимназияһы.