Яңы китаптар

Башҡортостандың халыҡ шағиры, прозаик, публицист, тәржемәсе һәм йәмәғәт эшмәкәре Гүзәл Ситдиҡованың «Балапандар күккә ынтыла» йыйынтығына мәктәпкәсә йәштә­ге һәм башланғыс синыф уҡыу­сыларына тәғәйенләнгән ши­ғырҙар, энциклопедик әкиәттәр ингән. Тыуған ил, иман һабаҡтары, йәйғор төҫтәре, тәбиғәт, үҫемлектәр, хайуан­дар донъяһы, ғаилә һәм башҡа темаларға белем, тәрбиә сығанағы булған шиғырҙар һеҙгә оҡшар, тип уйлайбыҙ.
Үҙе шуҡ булһа ла, тик «бишле» билдәләренә генә уҡыған, китап яратҡан, тиҙерәк, күберәк белем алырға тырышҡан кәзә малайы Текетек менән дуҫлашып, уның Ҡабырсаҡ менән булған йәнле аралашыуынан диңгеҙ хайуандары тормошо менән яҡындан танышырға, күп кенә файҙалы мәғлүмәттәр алырға, асыштар эшләргә мөмкинлек тыуыр. Ә ҡы­ҙыҡһыныусан, күҙәтеүсән Текетектең Бәшмәгестан илендә эйә булған белеме һеҙгә лә ярап ҡуйыр.
Лариса Фролова апайығыҙ­ҙың йәмле һәм йылылыҡ бөркөп, үҙенә тартып торған һүрәттәре китаптағы ваҡиғалар­ҙы «терелтеп» тә ебәрә.

Хәлил Һөйөндөковтың «Из­гелек» тип аталған китабында хикәйәләр һәм әкиәттәр туп­ланған. Зирәк, аҡыллы, тормошҡа етди ҡарашлы, ярҙамсыл, изге күңелле үҫмерҙәрҙең төрлө хәл-ваҡиғалар солғанышында юғалып ҡалмауы тас­уирлана был китапҡа ингән әҫәрҙәрҙә.
Яҙыусы тураһында
Ул Баймаҡ районы Мәмбәт ауылында тыуған. Һөнәре буйынса – хәрби табип-хирург. Йәш лейтенанттан подполковник дәрәжәһенә етеп, отставкаға сыға.
«Изгелек» – Хәлил Һөйөндөковтың балалар өсөн икенсе китабы. Тәүгеһе «Сыйырсыҡ ояһы» исеме менән нәшер ителде.
Авторҙан
«Үҙегеҙҙең тиҫтерҙәрегеҙ менән булған һәр төрлө ва­ҡиғалар, мажаралар иленә сәйәхәткә саҡырам. Һеҙҙең һымаҡ уҡ, гүзәлдәрҙән-гүзәл баш­ҡорт ерен төйәк итә улар. Әле мәктәп йәшендә, бәғзеләренең хатта бик кес кенә булыу­ҙарына ҡарамаҫтан, Ислам һәм Әлисә, Мәликә, Фәрит, Арыҫлан кеүектәрҙең был донъяға ололарса етди ҡарашы, Тыуған иленә, тәбиғәткә, кешеләргә ҡарата булған һөйөүе барығыҙҙың да күңеленә хуш килер, улар менән фекер­ҙәш булырһығыҙ, тигән ышаныстамын».