+12 °С
Ямғыр
Бөтә яңылыҡтар
Ҡыуаныслы хәбәрҙәр
7 Февраль 2020, 16:43
Ҡазандан еңеп ҡайттылар
Ҡазан ҡалаһында уҡыусыларҙың фәнни-ғәмәли конференцияһында ишембайҙарға ла ҡатнашыу бәхете тейҙе. Әйткәндәй, был сараны Татарстан Республикаһының Мәғариф һәм фән министрлығы ойошторҙо. Ул ике этаптан тора. Беренсеһе һайлап алыу туры булһа, икенсеһе – Ҡазан ҡалаһында үҙ эшеңде яҡлау. Башҡорт, татар, удмурт, сыуаш, мари – төрлө милли секциялар эшләгән.
– Башҡортостандан ундан ашыу уҡыусы барҙы. Беҙҙең Ишембай районынан өс кеше ине. Әхмәтзәки Вәлиди исемендәге 2-се башҡорт интернат-гимназияһының X cиныфынан – Алһыу Абдрахманова менән Алһыу Сарбаева, Смаҡай мәктәбенән Розалиә Аҫылғужина (уҡытыусыһы – Венера Биктимер ҡыҙы Әйүпова) ҡатнашты.
Алһыу Абдрахманованың эше – «Ноғман Мусиндың «Һайлап алынған яҙмыш» әҫәрендәге прототиптарҙы өйрәнеү». Был роман 1941 йылда һуғышҡа киткән Карам исемле егеттең Германиянан Зильда исемле ҡыҙҙы алып ҡайтыуы хаҡында. Ошо әҫәрҙе өйрәнеп, уның ысын ваҡиғаға ҡоролғанын, Карамдың – Сәйфетдин, Зильданың Франсиска икәнлеген асыҡлаған ул. Алһыу Сарбаева үҙенең яҡташы, Ырымбур өлкәһенән сыҡҡан яҙыусы Мөхәмәтша Буранғоловтың әҫәрҙәрендәге халыҡ йолаларын өйрәнеп, хәҙерге тормошта уларҙың ҡулланылышы тураһында һөйләне. Ә Розалиә Аҫылғужинаның эше Ноғман Мусиндың ижадында боронғо халыҡ кәсептәре хаҡында ине.
Был конкурс 180-се гимназияла уҙҙы. Уҡыу йорто матур йыһазландырылған. Беҙҙе бик йылы ҡаршы алдылар. Директоры Бәләбәйҙән, башҡорт егете икән, ярты коллектив – башҡорттар. Уҡыусылар эштәрен яҡлаған ваҡытта уҡытыусыларға туған телдәрҙе өйрәнеү буйынса оҫталыҡ дәрестәре күрһәтелде. «Башҡорт теле» секцияһының етәксеһе яҡташыбыҙ, Башҡортостан Яҙыусылар берлеге ағзаһы, Татарстанда йәшәгән дәүләт һәм йәмәғәт эшмәкәре Фирҙәүес Бәширова булды. Уҡыусыларҙың эштәрен бик юғары баһаланылар. Конкурстың һөҙөмтәһе буйынса, өс бәйгесе араһынан Алһыу Абдрахманова еңеүсе булды, ҡалғандары – призёрҙар.
Конференцияны ябыу тантанаһында мәғариф министрлығынан килгән вәкилдәр туған телдәрҙе өйрәнеү, һаҡлау әлеге көндә ниндәй әһәмиәткә эйә икәнлеген билдәләп китте. Шундай файҙалы сара ойоштороуҙары өсөн рәхмәт әйтәбеҙ. Ҡазандан илһамланып, дәртләнеп ҡайттыҡ, – тип һөйләне беҙгә башҡорт теле һәм әҙәбиәте уҡытыусыһы Рифат Риф улы Әйүпов.
Артабан да еңеүҙәр яулап, гимназиябыҙҙың мәртәбәһен күтәрергә яҙһын.
Фәүриә ЙӘЛИЛОВА, тәрбиәсе.
Ишембай ҡалаһы, Әхмәтзәки Вәлиди исемендәге 2-се башҡорт интернат-гимназияһы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж