+9 °С
Болотло
Бөтә яңылыҡтар
Юбилейҙар
26 Февраль 2021, 12:08
Сафуан ӘЛИБАЕВ
Атайҙар Атайҙар, атайҙар, атайҙар...Илемдең, еремдең терәге;Беҙ тыныс, беҙ иҫән, ил иҫәнТипкәндә атайҙар йөрәге.
Атайҙар, атайҙар, атайҙар.
Көтәбеҙ һағынып ҡайтҡанды,
Атайҙар килтерә түгелме
Усында күтәреп ал таңды?
Атайҙар, атайҙар, атайҙар...
Һаҡлайҙар, данлайҙар Ватанды.
Сабыйҙар көтһөндәр атайҙы,
Көтһөндәр тик эштән ҡайтҡанды!
Атайҙар, атайҙар, атайҙар...
Гел алда, гел алда атлайҙар.
Миҙгелдәр
Яҙ ғүмере үтә ҡыҫҡа һымаҡ:
Бер шаулашып боҙҙар китеүе,
Тәүге умырзая ҡыяғының
Ҡарҙы тишеп наҙҙар көтөүе.
Йәй ғүмере үтә ҡыҫҡа һымаҡ:
Салғының бер сыңлап ҡалыуы,
Үҙәк өҙөп кәкүк саҡырғанда
Йәшендәрҙең сыртлап алыуы.
Көҙ ғүмере үтә ҡыҫҡа һымаҡ:
Бер йәшкәҙәп көндөң йонсоуы,
Сыңғырашып ҡоштар киткән саҡта
Урын тапмай, япраҡ осоуы.
Ҡыш ғүмере... үтә оҙон икән:
Боҙ аҫтында – өнһөҙ ағын һыу,
Ҡыҫҡа көндәр – оҙон, күңелдәрҙә
Йәшәгәнгә яҙҙы һағыныу.
Урал тигән илдә үҫкәнбеҙ
Беҙ Иҙелдең көмөш һыуын эскән
Урал тигән илдә үҫкәнбеҙ;
Әсәйҙәрҙең матурлығы күскән,
Атайҙарҙың батырлығы күскән
Егеттәр һәм ҡыҙҙар икәнбеҙ,
Урал тигән илдә үҫкәнбеҙ.
Үҙ ҡулыбыҙ менән ерҙә күптән
Бәхет табыр саҡҡа еткәнбеҙ;
Әсәйҙәрҙең матурлығы күскән,
Атайҙарҙың батырлығы күскән
Егеттәр һәм ҡыҙҙар икәнбеҙ,
Бәхет табыр саҡҡа еткәнбеҙ.
Заман йөгө беҙҙең иңгә төшкән,
Ил яҙмышын яҙмыш иткәнбеҙ,
Әсәйҙәрҙең матурлығы күскән,
Атайҙарҙың батырлығы күскән
Егеттәр һәм ҡыҙҙар икәнбеҙ,
Урал тигән илдә үҫкәнбеҙ.
Алыш бармы?
Алыш бармы, биреш бармы? –
Беләктәргә көс тулышҡан,
Йөрәктәрҙә ғәйрәт ҡайнай,
Ут бөркөлә тын-һулыштан.
Алыш бармы, биреш бармы? –
Яҙмыш шулай һынау ала:
Аяҡ салған, хәрәмләшкән
Үҙе сәсрәп ауып ҡала.
Хаҡлыҡ мәңге алышҡанда
Харам шашып юлға сығыр;
Бил бирмәгән ир-аттарҙың
Тик ғәҙеллек юлдашылыр.
Тормош-бәйге уртаһында
Һыналалыр егет даны:
Йә сыҡ майҙан уртаһына! –
Алыш бармы, биреш бармы?
Хыялдарым
Хыялдарым, хыялдарым,
Һеҙ булғанда көн сыуаҡ;
Күңелемә эңер төшмәй,
Төндәрем дә көн һымаҡ.
Хыялдарым, һеҙҙең менән
Алһыу шәфәҡ таң саҡлы;
Мин юлдарҙа; ел-дауҙарҙа
Ҡайырылмаҫ ҡанатлы.
Һеҙҙең менән иңен-буйын
Иңләп сығам донъяның,
Барған һайын мин үҙемде
Бейегерәк тоямын.
Һеҙҙең менән мин теремек,
Етеҙ уйлы, маҡсатлы;
Һеҙҙән башҡа юлдар уңмаҫ,
Талпынһам да ни саҡлы.
Һеҙ юҡта, мин – йәйәһеҙ уҡ,
Аяныс ҡалыр яҙмыш;
Йәйәһеҙ уҡ кемгә кәрәк –
Ҡанатынан яҙған ҡош?..
* * *
Мин ҡулыма ҡәләм алдым...
Шытһын унан һүҙем – бөрө.
Офоҡтарға батҡан ҡояш
Уйҙарымдан сыҡһын кире.
Мин ҡулыма алдым ҡәләм...
Тамырҙарҙа шишмә тиртһен;
Бармағымдың остарында
Леп-леп итеп йөрәк типһен.
Читайте нас:
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930-2024 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г.Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж