-3 °С
Ҡар
Бөтә яңылыҡтар
"Ҡурсаулыҡтың айыуҙары ултырып шыуа тауҙан..."
Быйылғы йәй эҫе көндәре менән йонсотто. Ҡоролоҡ сәбәпле, үлән көйөп кенә бөтмәне, урман янғындарына етди бер сәбәпкә әйләнде. Бигерәк тә Бөрйәндәге Башҡорт дәүләт тәбиғәт ҡурсаулығын көслө ут ялмап алыуы күңелдәрҙе әрнетте. Ошо районда йәшәгән шағирә Айһылыу Ғарифуллинаның тетрәндергес уй-кисерештәрен тыныс ҡына уҡып булмай...
ЗАМАНА БӘЙЕТЕ
Һарғая, Ҡолғана яҡтарында янғында булғанда ғибрәтле ваҡиғалар һөйләнеләр: Бөрйән урмандарының хужаһы – меҫкен айыуҙар, арттарына ут тоҡанғас, тауҙан аҫҡа ҡарай ултырып шыуа икән. Бер инә бүре, кеше эргәһендә ҡалһа, балалары уттан имен булыр, типтер инде, төнөн ут артабан таралмаһын, тип һаҡҡа ҡалған ҡурсаулыҡ хеҙмәткәрҙәре эргәһенә өс балаһын алып килеп ҡалдырған да, үҙе 50 метр самаһы эргәлә төнөн илап-олоп сыҡҡан – быларынан тыш, моғайын, ут эсендә тағы балалары ҡалғандыр, сөнки инә бүре ошо тирәнән ике-өс көн китмәгән... Ҡоштар, янғындан ҡасып осоп килә лә, был яҡта ут менән көрәшеп йөрөүсе кешеләрҙән өркөп, кире ут эсенә ырғый икән... Иҫ китмәле, йөрәкте әрнетер хәлдәр – бер Аллам ғына Бөрйән ерен афәттән һаҡлай күрһен, бәрәкәтле ямғырҙарын бирһен, районыбыҙ бәләгә тарығанда ярҙамсы, изге күңелле бәндәләрен, уйламаған ерҙән ярҙамын ебәрһен. Амин!
Урман яна, урман яна –
Көлгә түгел, күмергә –
Бөрйәндәрҙең даны китер
Йылға түгел, ғүмергә...
Урман яна – иңрәй ерем –
Күктәргә ҡул һонолған.
Ер ҡаурыйымы ағастар
Рәнйеш яҙып, йығылған?..
Урман яна – ҡырмыҫҡалай
Сабауыллайҙыр халыҡ.
Ялмауыҙҙың ялҡын теле
Өлгөрә шул – мин алыҡ...
Ҡурсаулыҡтың айыуҙары
Ултырып шыуа тауҙан.
Януар-кейек аҡыллыраҡ –
Ҡотолмаҡ кәрәк ауҙан.
Инә бүре олой-олой
Йөрәктәрҙе теләлер,
Кеше янында баллары
Һау ҡалырын беләлер.
Уттан ҡасып осоп килгән
Ҡошҡайҙарҙың хәлдәре –
Кешенән өркөп, кир(е)утҡа
Инеп янған мәлдәре.
Артыштарҙың, күбә булып,
Янып күккә осоуы –
Тәбиғәттең тамуҡ утын
Иңрәп-илап ҡосоуы.
Бер гонаһһыҙ йәнлек-януар,
Тәсбих әйткән ағастар,
Беҙҙең гонаһ арҡылымы
Китәләр һеҙҙең баштар?..
Күккә ҡарап "тимер ҡош" то
Көткән булһа ла күптәр.
Османы улар ярҙамға –
Ярылды, йәшнәп, күктәр...
Ерле халыҡ, ирекмәндәр,
Хеҙмәткәрҙәр – барыһы
Ҡулдары менән яманы
Ерҙең оло яраһын.
Күккә ҡарап ялбарабыҙ:
Бер һиндә өмөт, Аллам –
Бөрйән еренә ямғыр бир –
Ялҡын эсендә ҡалған...
Айһылыу Ғарифуллина.
Фото "Таң" гәзите сайтынан.
Читайте нас:
Редакция һайлауы
Новости партнеров
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж