Алма ҡағы

Әле генә ауылдарҙа был ризыҡты бик әҙерләп бармайҙар. Күптәр ҡайнатманы ла эшләмәй хәҙер, емеште туңдырғысҡа һалып ҡуялар ҙа ҡышҡыһын алып, иретеп ашай­ҙар. Әлбиттә, йәйҙе һағын­ғанда еләкләп сәй эсеүе бик күңелле. Әммә ҡаҡ эшләһәң дә, еләк-емештең витаминдары һаҡлана, һаулыҡҡа фай­ҙалы ризыҡ килеп сыға.

Алмаларығыҙҙы ҡайҙа ҡуйырға белмәйһегеҙме? Ҡаҡ эшләп ҡарағыҙ, шәкәр ҙә кәрәкмәй. Тәүҙә орлоҡтарынан таҙартабыҙ ҙа 2 – 4 өлөшкә бүләбеҙ. Шунан ҡалын төплө кәстрүлгә һалып, талғын утта ҡайнатабыҙ. Көймәһен өсөн төбөнә самалы ғына һыу ҡоябыҙ. Йомшаҡ алмалар тиҙерәк әҙер була. Иҙелә башлаған емештәрҙе тимер иләк аша үткәрәбеҙ. Ә кәстрүлдәге һутҡа әҙ генә шәкәр өҫтәп эсергә мөмкин. Бик тәмле. Бешкән алмаларҙы блендер ярҙамында иҙәбеҙ. Хәҙер йоҡа ғына итеп йәйеп киптерергә кәрәк. Мейескә ҡуй­һағыҙ, ишеген япмағыҙ. Таҡтаға һалып ҡояшта киптерһәң дә ярай. Аҫтына пергамент ҡағыҙы һалырға онотмағыҙ. Ҡаҡ кипкәс, торба кеүек төрөп ҡуйырға йәки дүрткелләп киҫергә була. Сәй эскәндә бына тигән тәмлекәс.

Фото: www.instagram.com