Беренсе эш хаҡым

Әсәйем фермала һауынсы булып эшләй. Мине үҙе менән йәйләүгә алып китте лә һыйыр һауырға өйрәтте. Был эште белеүемә бер яҡтан шат­ланһам, икенсенән, малдар менән яҡындан аралашыуы – үҙе бер ғәжәп донъя. Елендәре тулышҡан һыйыр­ҙарға буш биҙрәне шалтыратһаң, мөңрәп ҡаршы алалар. Арҡаларынан һыйпап, һауырға ултырам. Иркәләгәнде малдар ҙа аңлай шул.
– Бала кешегә һөттәрен бөткәнсе бирмәҫ, – тип шикләнгән Мәстүрә апай мин һауған һыйырҙы үҙе тикшереп ҡараны бер мәл. «Улың мал менән тиҙ уртаҡ тел тап­ҡан бит, бар һөтөн һауып алған», – тип ғәжәпләнде әсәйемә.
Һөттө сепараттан айыртыусы ла, иҫәп-хисап эштәрен алып барыусы ла булып эшләгән Ғәлиә апай сирләп, уны дауаханаға алып киттеләр. Ә эшен баш­ҡарыусы кеше юҡ. Аптырағандан миңә ҡуштылар.
– Ҡустым, белемең етерлек, һауынсыларҙан һөттө ҡабул итеп ал. Сепаратты әйләндерергә буйың да, ҡулың да оҙон, һөттө айыртып та бирерһең, – тине ферма мөдире.
Һауынсылар һауған һөттө үлсәп, дәфтәргә яҙам. Йылы сағында сепараттан айыртам. Бындай эште башҡара алыуыма бик шатландым. Ун көн алып барҙым ошо эште. Көҙ еткәс, хеҙмәт ха­ҡы итеп илле кило бойҙай бирҙеләр. Был минең үҙ ғүмеремдәге беренсе эш ха­ҡым булды. Ул саҡта хәреф танып уҡый-яҙа, алыу-ҡушыуҙы белеү юғары белемгә тиң булып иҫәпләнә ине шул.
– Бына бит, улым, белемле бул­ғас, эшләп хеҙмәт хаҡы ла алды, – тип ҡыуанып олатайым арҡамдан һөйҙө.

Юнир САЛАУАТОВ.