-11 °С
Болотло
TelegramТестарVKOK
Бөтә яңылыҡтар
Новости
14 Ноябрь 2020, 16:43

Пермь крайы Барҙа ауылындағы башҡорт йәкшәмбе мәктәбенә кабинет йыһазландырыу өсөн сертификат тапшырылды

Пермь крайы Барҙа ауылында башҡорт телен, мәҙәниәтен, йолаларын өйрәнеү буйынса башҡорт йәкшәмбе мәктәбендә тантаналы көн. Уҡыусылар ҡунаҡтарҙы — Башҡортостан Республикаһынан делегацияны ҡаршылай. Башҡорт мәҙәниәте һәм мәғрифәте көндәре сиктәрендә Бөтә донъя башҡорттары ҡоролтайы, БР Мәғариф һәм фән министрлығы, Барҙа районы хакимиәте вәкилдәре, ғалимдар Ғабдулла Туҡай исемендәге Барҙа гимназияһында асылған йәкшәмбе мәктәбе менән таныша.

«Һеҙ - был башҡорт йәкшәмбе мәктәбенең тәүге уҡыусылары, башлап йөрөүселәр. Үҙ башҡорт телегеҙҙе өйрәнеүегеҙ маҡтауға лайыҡ. Һеҙҙең алда яңы юлдар асыла, уңыштар теләйбеҙ. Киләсәктә беҙ һеҙҙең исемдәрегеҙҙе ишетербеҙ һәм «Ул ғәйнә башҡорто» тип оло ғорурлыҡ менән әйтербеҙ. Яҡшы уҡығыҙ, арҙаҡлы яҡташтарығыҙ Туҡтамыш Ижбулатов һәм Исмәғил Тасимов кеүек шәхестәргә оҡшарға тырышығыҙ. Бөтә донъя башҡорттары һеҙ, балалар, башҡорт телен һаҡлар, үҫтерер тип ышана»,- тине Бөтә донъя башҡорттары ҡоролтайы Президиумы рәйесе Эльвира Айытҡолова.


Дәрестәр аҙна һайын, һәр шәмбе уҙғарыла. Ике төркөм ойошторолған: 3-4 кластар- башлап өйрәнеүселәр һәм 5-6 кластар — дауам итеүселәр. Башҡорт телен Тәтешле районы Үрге Тәтешлеләге 1-се мәктәптән башҡорт теле һәм әҙәбиәте уҡытыусылары Зилә Нуриханова, Лиза Фәтхуллина, Альбина Әүхәҙиева өйрәтә.


«Мәктәбебеҙ БР граждандар йәмғиәтенә булышлыҡ итеү фонды тарафынан уҙғарылған конкурста еңеү яуланы һәм был проект дәүләт һәм туған телдәрҙе үҫтереү һәм һаҡлауға йүнәлтелгән республикабыҙ Башлығы Грантына тормошҡа ашырыла. Проектыбыҙ «Туған тел- халыҡтың күңеле» тип атала. Дәрестәргә балалар ҙур теләк менән йөрөй. Башҡорт алфавитын өйрәндек, башҡорт телендә йырҙар йырлайбыҙ, шиғырҙар ятлайбыҙ»,-ти проект кураторы Альбина Әүхәҙиева.


БР мәғариф һәм фән министры урынбаҫары Әлфиә Ғәлиева йәкшәмбе мәктәбенә башҡорт теле кабинетын йыһазландырыу өсөн сертификат тапшырҙы.

Читайте нас в