334 523 кеше башҡорт теленән диктант яҙған!

Диктантты барлығы 334 523 кеше яҙҙы! Уларҙың 125 179-ы - башланғыс кимәлдә, 140 019-ы - иркен аралашыу кимәлендә һәм 69 325 кеше төньяҡ-көнбайыш диалектында яҙған. Сағыштырыу өсөн 2021 йылдың һандарына күҙ һалайыҡ: башланғыс кимәлдә -159 510, иркен аралашыу кимәлендә- 106 794 һәм төньяҡ-көнбайыш диалектында 55 478 кеше яҙған.
- Башҡорт теленән халыҡ-ара диктант географияһы йылдан-йыл киңәйә, ҡыҙыҡлыраҡ һәм берҙәмерәк була бара. Республика Башлығы Радий Хәбировтың акцияла ҡатнашыуы айырыуса байрамса төҫ бирҙе. Быйыл диктантты офлайн-майҙансыҡтарҙа йыйылып бергәләп яҙыу мөмкинлеге булыуы ҡыуандырҙы. Минеңсә, был - бик изге йола. Шәхсән үҙем өсөнсө тапҡыр диктантты төньяҡ-көнбайыш диалектында яҙҙым. Быйыл беҙҙең диалект өсөн дә махсус тел нормалары әҙерләнеүе бик ҡыуандыра. Бының өсөн танылған ғалимдарҙы, тел белгестәрен һәм башҡорт теленең төньяҡ-көнбайыш диалектында һөйләшкән төрлө район вәкилдәрен йәлеп иткән Бөтә донъя башҡорттары ҡоролтайына рәхмәт әйткем килә , - тине Туймазы башҡорт тарихи-мәҙәни үҙәгенең баш белгесе Альберт Исмаил.
Рәсәйҙең төрлө төбәктәренән дә - Мәскәү, Санкт-Петербург, Екатеринбург, Сочи ҡалалары, Силәбе, Ырымбур, Мәскәү, Һарытау, Һамар, Ҡурған, Свердлов, Мурманск өлкәләре, Ханты-Манси автономиялы округы, Ямал-Ненец автономиялы округы, Пермь, Алтай, Приморский крайҙары, Яҡутстан, Татарстан республикаларынан ҡатнашыусылар булыуы ҡыуандыра.
Донъяның Үзбәкстан, Тажикстан республикаларынан, Испания, Швейцария, Германия, Бөйөк Британия, Италия, Франция, Канада, Ҡаҙағстан, Төркиә, Польша, АҠШ илдәренән диктант яҙыусылар булды.
Билдәле йырсы Зилиә Бәхтиева диктантты Башҡортостан юлдаш телевидениеһында тура эфирҙа яҙҙы.

-Тура эфирҙа диктант яҙыуы - биҡ ҡыҙыҡ та, яуаплы ла эш. Текст ныҡ уйландырҙы, бай йөкмәткеле ине. Күп йылдар сәхнәлә ижад итеп йөрөгәс, башҡорт теле грамматикаһы онотола башлаған. Ләкин бындай саралар барлыҡ йәһәттән дә камилыраҡ булырға әйҙәй, – тип белдерҙе ул.
Был халыҡ-ара акцияла ҡатнашыусыларҙың һәр береһенә электрон сертификаттар ебәреләсәк.