Һәр сәғәттәре файҙалы үтте

Балаларҙы физик һәм рухи яҡтан сыныҡтырыу, үҙтәрбиә менән шөғөлләнеүгә нигеҙ һалыу, уның булмышында, аңында тәбиғәттән бирелгән, быуындан-быуынға күсә килгән һәләтен асыу йәһәтенән төрлө йүнәлешле түңәрәктәр ойошторҙоҡ. Һәр кем күңеленә оҡшаған шө­ғөлдө таба алды. «Кәйеф йәй­ғоро»нда балалар менән педагог-психолог шөғөллән­һә, «Тылсымлы ҡағыҙ» тигәнендә оригами техника­һын ҡулланып, төрлө ҡул эштәре нескәлектәренә өйрәнделәр. «Креатив ҡул эштәре» түңәрәге лә бик мауыҡтыр­ғыс булды, йомшаҡ һәм ялбыр материалдар ҡулланып, уйынсыҡтар эшләнеләр. «Тылсымлы бумала»ла һүрәт төшөрөүҙә төрлө ысулдар барлығын, «Шаян туп»та футбол, донъяның шәп футболсылары тарихын, уйнау алымдарын белделәр. «Еҙ үксә»лә зифа буйлы ҡыҙҙарыбыҙ бейеү оҫталығын арттырһа, «Домисолька»ла йыр серҙәренә төшөндөләр. «Отҡор айтишниктар» түңәрәгендә буласаҡ инженерҙар төрлө технологиялар ҡулланып, инженерия өлкәһен үҙләштер­ҙе.
Лагерҙа ял итеүсе балаларҙың һәр сәғәте файҙалы ла, күңелле лә, мауыҡтырғыс та үтһен өсөн райондың төрлө ойошмалары менән хеҙмәттәшлек алып барҙыҡ. Был йәһәттән балалар китапханаһы, тыуған яҡты өйрәнеү музейы, янғын һүндереү, полиция, мәҙәниәт, ЮХХДИ бүлектәре ярҙам итте.
Һуңғы йылдарҙа райондың төрлө эшҡыуарҙары менән хеҙмәттәшлек итеү ҙә йолаға әйләнде. Балалар «Йомарт» магазинының стенаһына «Күңелле бала саҡ» тигән граффити төшөрөп, шәхси эшҡыуарҙан төрлө тәмлекәстәр алып ҡыуанды. Ял итеүселәргә «Күстәнәс» ҡамыр аштары бешереү цехына экскурсияға барыу ҙа бик оҡшаны, осрашыу аҙа­ғында оҫталыҡ дәресе кү­ңелдәренә хуш килде.
Тарихты өйрәнеүгә лә ҙур иғтибар бүлеп, райондың төрлө тәбиғәт ҡомартҡыларына экскурсиялар ойош­тор­ҙоҡ. Степной ауылынан биш саҡрым алыҫлыҡта урынлашҡан Ҡайын-ҡабаҡта булдыҡ. Бында мезозой эра­һына ҡараған диңгеҙ ҡатламдарының уникаль өлгөләре һаҡлана. Меңйә­шәр ҡарағас Юлбарыҫ ауылынан 5 саҡрым алыҫлыҡта үҫә. Бөгөн ул Көньяҡ Уралдың иң оло ағасы һанала. Таштуғай тауҙары, Йомортҡалы кү­ле, Аҡъяр тыуған яҡты өйрә­неү музейына сәйәхәт тә уҡыу­сылар күңелендә онотолмаҫ тәьҫораттар ҡалдыр­ҙы.
Түңәрәктәрҙән, төрлө сараларҙан арып-талып, асы­ғып та өлгөргән балалар лагерь ашханаһында мах­сус төҙөлгән меню буйынса фай­ҙалы ла, витаминлы ла ризыҡтар менән һыйлан­ды.
Эйе, йәйге матур мәл бик тиҙ үтә. Шуға күрә ошо ва­ҡытта балаларҙың сынығып, һаулығын нығытып, яңы уҡыу йылына көс-дәрт йыйып килеүҙәрен теләйбеҙ.

Дилбәр ИСҠУЖИНА,

директорҙың тәрбиә эштәре буйынса урынбаҫары.

Хәйбулла районы,

Аҡъярҙағы 1-се мәктәп.